KUCHING: Perintah beratika penanggul rega rumah ke balat udah niki ti ditapi rayat.
Menteri Pengawa Berumah, Datuk Amar Abang Johari Tun Openg (gambar) madah, penanggul nya udah dibantai maya sesyen debat Rang Undang-undang Pemansang Pengawa Berumah (Sekat enggau Lisin) 2013 ti udah dikemendar minggu nyin tadi.
“Perintah ngambi atur nyengkaum mayuh macham chara mutarka penanggul tu, nengah atur rumah kos murah enggau kos numbas pemar, ngaga rumah kos murah enggau rumah ke ulih diempu sereta ngena perengka fiska enggau wang,” ku iya.
Keterubah, ku Abang Johari, perintah menua udah ngaga atur nyekat rega ke dua kategori rumah ke benung digaga, iya nya rumah kos murah enggau rumah numbas pemar.
Iya madah sekat rega rumah tu digaga nengah atur pengereja pengawa kena beratika sida ke bepemisi mimit enggau numbas pemesai ulih meli rumah diri.
“Perintah Menua udah netapka rega pemadu tinggi rumah kos murah naka RM50,400.00 seunit ba tengah enggau RM59,220.00 seunit ba tisi.
“Rumah kos numbas pemurah, rega ditetapka ba RM80,000.00 seunit ba tengah enggau RM100,000.00 seunit ba tisi,” ku iya.
Iya madah baka tu lebuh nyimpul jurai penemu ba Hari Ke-7, Aum Kedua Renggat Ketiga, Aum Kunsil Nengeri ke-17 ditu, kemari.
Iya nandu, bisi dua piak, iya nya Perintah nengah Opis Pengawa Ngaga Rumah (JPN) enggau HDC sereta peribit disengkaum dalam pengawa ngaga rumah kategori tu.
“Tu deka nambah agi pemayuh rumah dalam makit enggau rega ke ulih dibeli mensia mayuh,” ku iya.
Abang Johari madah, opis menteri iya enggau kerejasama ijinsi bekaul enggau pengawa ngaga rumah benung mansik atur enggau kuasa, rumah kos murah kena ngemanahka agi mekanisme ke udah bisi diatu sereta beratika ubah baru ke manah ke ulih dikena dalam atur tu.
Atur kedua, iya madah nengah chara nambah bekal rumah nengah atur mayuh macham projek enggau program pengawa rumah mensia mayuh nyengkaum pampang peribit.
Tu nyengkaum ‘Skim Rumah Mesra Rakyat (RMR), Program Perumahan Rakyat (PPR), Skim Rumah Mampu Milik (RMM), Skim PR1MA, Skim Rumah Pertamaku, enggau Skim Pemilikan Rumah Mampu Milik Sektor Swasta (MyHome) ‘ ti ulih mantu mutar sereta ngenegapka rega rumah ke ulih dibeli sida ke bepemisi mit, numbas pemesai sereta sida ke baru belabuh gawa, ku iya.
“Nengah mayuh macham inisiatif baka tu, rega rumah ditetap nengah rega makit nengah subsidi rega rumah tauka subsidi kos rumah ulih Perintah enggau pengulih atur ke manah, ke ulih narit raban dalam kategori tu,” ku iya.
Ketiga, strategi kena mutarka rega rumah niki, mega nyengkaum pemun atur fiskal enggau wang di renggat Perintah Besai.
“Dalam pekara tu, Perintah Besai udah meri kelala sekeda atur kena mutarka rega rumah ari niki.
“Tu nyengkaum nambah penyampau ‘Real Property Gains Tax (RPGT)’ baka ke udah dipadahka Menteri Besai (PM) dalam Bajet 2014 bedau lama tu tadi, alai pekara nyual baru retanah dalam kandang 3 taun dichukai dalam 3 persin.
“Tang taja pia, pengawa melaba enggau pengawa ‘flipping’ enda entu balat di menua tu baka ke di semenanjung, kelebih agi di Lembah Kelang…..Atur baka nya ulih nyeliah penanggul baka nya nyadi di Sarawak,” ku iya.
Kelimpah ari nya, palan wang ditagang nyendia mayar projek ke bisi bekaul enggau ‘Developer Interest Bearing Scheme (DIBS)’ kena nyeliah pemaju ngemasukka bungai ke dalam rega rumah.
“Atur tu dijangka ulih ngurang pelaba retanah ke tau ngasuh rega retanah ari majak niki,” ku iya.
Iya madah, kelimpah ari nya mega, Bank Negara udah netapka lun rumah ketiga, orang ke ngambi lun nya nitihka pengabis tinggi ‘loan-to-value’ (LTV), iya nya 70 persin.
Penyampau LTV ku iya, dikarap ulih nyekat aktiviti nanam pukuk retanah sereta pelaba lebih (spekulasyen laban orang ke meli nya mesti mayar 30 persin ari rega kos rumah enggau pemisi diri dulu.
“Perengka guna fiskal bukai ke dikena Bank Negara, iya nya penyampau bungai enggau atur simpan tauka statutory reserve requirement ke ulih ditikika tauka dikurangka barang maya bepanggai ba pemerat maya nya enggau makit.
“Perintah deka terus beratika rega rumah ke majak nambah lalu enti ulih, deka mantaika atur penambah fiskal kena beratika rega retanah enda kelalu tinggi sereta ngenusahka pemeli rumah,” ku iya.