KUCHING: Pelin Besai Pasar Debak ke ngemeratka pemansang sosio-ekonomi peranak menua dia udah dibantai ba Kaunsil Perambu Nengeri kena bulan Julai 2013 tu tadi tang bisi sekeda ubah digaga sebedau pelin nya diberi pemutus.
Menteri Perambu Penatai Pemisi enggau Rampa Menua, Datuk Amar Awang Tengah Ali Hassan madah baka tu lebuh nyaut tanya ari ADUN Saribas Radzi Sitam ke deka nemu penembu palan enggau pelin projek Palan Servis Supa-Tuie-Manggut ke mungkur pemesai 104 hektar ti udah dikemendarka Kaunsil Perambu Menua kena 19 Mei 2011 ke alai kos semua projek nya dipelaba urung RM34.4 juta.
“Dalam Lumpar Pemansang Malaysia (RMK10) ke-10, siling ungkup ke dikemendarka dalam RM5 juta kena mayar tanah ke kena bungkur nya, kereja nyukat, pengawa nukuh enggau ngaga jalai batu pemanjai 2 kilometer,” ku Awang Tengah lalu nambah pengawa ngaga jalai enggau infrastruktur bukai udah belabuh lalu dipelaba tembu dalam bulan Mac 2014.
Kelimpah ari nya, iya madah, pelin enggau palan servis projek Tanjung Assam-Sebemban-Belingan, ke mungkur 179 hektar tanah udah dikemendarka Kunsil Perambu Menua kena 19 Mei 2011.
“Projek nya dipelaba deka ngena semua kos urung RM30 juta. Dalam RMK10, siling ungkup ke dikemendar bisi RM7 juta kena mayar kos ngambi tanah enggau ngaga jalai belakin 2 kilometer lalu pengawa ngaga jalai dipelaba deka belabuh pun taun 2014,” ku iya.
Awang Tengah madah baka tu lebuh nyaut sekeda tanya ari ADUN bukai bekaul enggau sitak sida maya nyimput jurai ba di Aum Kedua Renggat Ketiga, Aum Kunsil Nengeri (DUN) ke-17 ditu, ensana.
Lebuh nyaut ADUN Engkilili, Dr Johnicol Rayong bekaul enggau apak sekula ke nadai surat tanah (pajakan rasmi), Awang Tengah madah Perintah Besai enggau Perintah Menua udah nemu pasal pekara tu.
Iya madah, Kepala Direktor Opis Tanah enggau Pengeraja Asal Malaysia udah numbuhka komiti ‘Program Pemutihan Tapak Bukan Milik Pesuruhjaya Tanah Persekutuan’ ke dikena opis menteri enggau ijinsi opis perintah besai di Sarawak.
Komiti nya ku iya, diarika ketuai opis perintah besai nyengkaum Opis Tanah enggau Survei (JTS) Sarawak.
“Tuju ke batang, iya nya ngelala status palan nya ngambika ulih dipindah orang ke ngempu ngagai Komisyener Tanah Perintah Besai. Ungkup Opis Pelajar Sarawak (JPS), iya mungkur sekula perintah aja, laban sekula ke dibantu modal tauka ukai perintah, baruh kuasa Lembaga Pengurus Sekolah nya empu.
Proses meresi tu dipelaba deka dikereja dalam timpuh ke lama. Taja pia, seagi-agi sekula nyadi kena enggau tuju alai belajar, Perintah Menua ngemendarka sekula nya terus dibuka ngambika pelajar nembiak enda dikachau,” ku iya.
Iya nambah, komiti nya udah ngelala urung 440 premis sekula di serata menua Sarawak, ke alai 11 ari peyampau nya, di sitak DUN Engkilili.
“Dua buah sekula, SK San Semanju enggau SK Aping udah diberi pemendar endur sekula nya digaga ari Opis Kausil Perambu Nengeri. Program meresi nya sebengkah ari pengawa perintah ke terus dipejalaika di menua tu,” ku Awang Tengah.