KUCHING: Perintah ba pengawa ngemeratka pemesai guna pelajar deka ngaga mayuh agi kelas Pelajar Tumu Anak Mit di menua tu.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah, dalam bajet 2014, Menteri Besai ngemendarka pengawa ngaga 93 buah kelas prasekula di serata menua, lalu ari penyampau nya, 26 buah ungkup Sarawak.
Iya madah, kena mantu apai indai ke gawa, Perintah meransang palan penyaga anak mit (taska) ba endur gawa nyadi perengka guna sukung pengawa rama.
Datai ke diatu, bisi tiga buah palan penyaga anak mit udah dipenyadi, iya nya Taska Yayasanku Sayang, Taska Nur Wisani Biro Wanita Kuching enggau Taska Institut Kemahiaran Belia Negara (IKBN) pampang Miri, lalu tiga buah agi deka dibuka enda lama agi (SMK Subis, UNIMAS enggau opis Sekretari Perintah Besai, Kuching).
“nambah penyampau palan penyaga anak mit ba palanr gawa, perintah udah netapka ungkup ‘one-off’ dalam RM200,000.00 ngagai barang Opis Menteri enggau Opis Perintah ke deka muka TASKA ba palan pengereja pengawa perintah.
”Kelimpah ari nya, perintah mega bisi nyendiaka sabsidi TASKA urung RM180 sebulan ungkup tiap iku anak mit ngagai apai indai ke bepemisi kurang ari RM5,000.00 sebulan, lalu sabsidi taska RM250.00 sebulan ngagai apai indai ke bepemisi enda lebih RM920.00 ke nganjung anak sida iya ngagai Taska peribit ke direjister ba Opis Pengintu Pengelantang Raban Bansa (JKMS) belabuh ari Januari 2014,” ku Fatimah.
Iya madah baka tu lebuh nutup jurai penemu maya Aum Kedua Renggat Ketiga, Aum Kunsil Nengeri ke-17 ditu, ensana.
Berindik ari nya, iya ngelalau apai indai enggau palan penyaga anak mit ngambi ulih ari perengka guna ke bisi disediaka perintah.
Ba nembiak ke nyelai pengelandik, perintah udah muka enam buah tadika integresyen ba sekula primari (SK Semerah Padi, Kuching; SK Tabuan Ulu, Kuching, SK Abang Aing, Sri Aman, SK Abg Hj Matahir, Sarikei, SK Jalan Deshon, Sibu, enggau SK Jalan Bintang Miri, enggau empat buah tadika ba sekula Pendidikan Khas (SKPK Samarahan, SKPK Kuching, SKPK Sibu, SKPK Miri).
Nembiak mit ke betapi enggau Autisme ke berumur 4 taun ke baruh, perintah udah muka sebuah taska Austisme di Sibu, ku Fatimah.
Nyaut tanya ari Kaban Kunsil Nengeri Engkilili, ADUN Johnical Rayong, Fatimah madah, nadai sekula ngembuan empat iku pengajar taja pan sekula nya ‘Sekolah Kurang Murid’ (SKM), baka ke dibantaika ADUN Engkilili nya.
“SKM (B) ke pengabis mit di Engkilili (SK Emplam) ke bisi 41 nembiak (enggau kuota 12 iku pengajar) disediaka enggau 12 iku pengajar.
Nyaut tanya ari ADUN Ba’kelalan, sebuah sekula sekondari di sitak Long Semadoh kala diperambu Opis Pelajar Pelilih Mit (PPD) tang enda ulih digaga laban sekula sekondari di Pelilih Mit Lawas agi ulih nampung penyampau nembiak naka kediatu.
Baka nya mega sekula sekondari baru ba sitak Selangau, enda ulih digaga laban ke diatu SMK Ulu Balingian agi ulih nampung penyampau nembiak ba sitak nya.
Fatimah madah, naka ke diatu, rentayan jalur lebar bedau ulih digaga laban agi diperundingka kunteriktor ke ngaga projek nya.
“Tang taja pia, sekula ulih milih sebarang ‘Internet service Provider’ (ISP) tang enda ngelui RM600 sebulan.
Lebuh nyaut tanya ADUN Tamin, Datuk Joseph Mauh Ikeh nya bekaul enggau nyendiaka pengajar di sitak Tamin, Fatimah madah kuota pengajar sekula primari bisi 364, lalu datai ke sehari tu, 362 pengawa puang nya udah diisi enggau pengajar ke udah dilatih.
“Ungkup sekula sekondari, kuota pengawa 53, lalu ke udah diisi 52. Nya alai, enti madahka mayuh pengajar enda dilatih di sitak nya, nya enda amat,” ku iya. Nyaut tanya ari ADUN Balai Ringin, Snowdan Lawan, Fatimah madah atur ke diatu ngaga sekula baru, sitak nya patut udah bisi karan enggau ai.
“Dalam konteks perambu ngaga SMK Sabal, enda ulih digaga laban enda ngemenuhka atur nadai ai enggau karan,” ku iya.
Pasal SMK Balai Ringin, pengawa ngemanahka struktur rumah sekula nya benung digaga enggau kos RM605,669.90.
Kelimpah ari nya, perintah udah nembuka dewan dalam RM2.4 juta. Pengawa masang wayar agi ba renggat sebut rega.
“Sekeda sekula primari mega udah diberi ungkup pemansang kena ngemanahka agi sekula sida, baka SK Nyelitak RM49,000, SK Sebangkoi/Mawang RM47,000, SK Tuba ke projek rumah pengajar RM1.096 juta, SK Jaong (ngaga enam buah kelas baru enggau empat unit rumah pengajar) RM2.106 juta enggau ngaga prasekula urung RM598,800.00 nyengkaum ngemanahka agi rumah sekula SK Semada urung RM90 juta enggau ngaga prasekula dalam RM554,380.00.