TEMBU: Abang Johari nunjukka pekara ti udah dipejuraika iya maya ti nyimpul jurai Opis Menteri Dagang Temuai ngagai Kaban Kunsil Nengeri (ADUN) Pantai Damai Dr. Abdul Rahman Junaidi (tengah) , seraya diperatika ADUN Telang Usan Dennis Ngau (kanan) enggau sida kebukai.
KUCHING: Opis Menteri Dagang Temuai ngansak enggau meransang peranak menua pesisir nengeri nyereta sereta ngemansangka industri dagang temuai nengah Program Nyemilik.
Kebuah pia ku Menteri iya, Datuk Amar Abang Johari Tun Openg, laban Program Nyemilik ambika banding nyadi pemadu tebilang ba bala temuai ari dalam enggau menua tasik.
“Opis Menteri deka terus meransang mayuh ari peranak menua pesisir nyereta industri dagang temuai nengah Program Nyemilik enggau CBET. Program Nyemilik ambika banding nyadi pemadu tebilang ba bala temuai ari dalam enggau menua tasik.
“Nyentukka diatu serata nengeri bisi 29 genturung pendiau (nyengkaum rumah panjai) ti mungkur 439 operator udah direjister dibaruh Program Nyemilik.
“Naka bulan Oktober taun tu, Program Nyemilik di Sarawak mujur narit sepenyampau 10,582 iku temuai ti nyengkaum 1,937 (20 persin) temuai ari menua tasik enggau 8,645 iku temuai ari dalam menua tu empu. Lalu dipelabaka asil penatai pemisi ari program tu sepemanjai timpuh nya iya nya RM1.022 miliun,” ku iya.
Abang Johari mansutka pekara nya lebuh ti nyimpul jurai Opis Menteri Dagang Temuai ba Aum Kunsil Nengeri (DUN) di Kompleks DUN ditu kemari.
Bejaku baru iya madah, perintah bejalaika atur enggau latih dikena ngenukuka operator ulih nyendiaka servis ti bekualiti sereta perengka guna ti engkeman.
“Dikena ngenukuka kualiti servis enggau penyendia perengka guna ari raban operator program nyemilik nitihka setindit ti ditetapka, opis menteri aku ngatur sekeda pengawa Auditing enggau Roadshow.
“Opis menteri begulai enggau ijinsi ari perintah besai deka meruan meri latih enggau kursus ngagai semua operator program nyemilik ti direjister,” ku iya.
Kelimpah ari nya iya madah, gempuru betaun ulih pengereja program nyemilik diatur kena 17 ngagai 21 September 2013 ba Homestay Rumah Benjamin Angki, Kanowit dengan tuju kena ngerembaika penerang baru, bekunsi jerita pemujur sereta nyadika palan kena bekunsi penemu enggau idea.