KUCHING: Chairman Parti Keadilan Rakyat (PKR) Nengeri Baru Bian bepenemu perintah bisi penyaru ti madahka tanah adat bansa Asal (NCR) ulih digaga sereta diulihka, ti dikumbai temuda.
Iya madah, tanah NCR nya ukai semina temuda (ti diberesi/endur bekebun) aja tang nyengkaum Pulau Galau enggau Pemakai Menua.
Ku iya, pekara nya dipadahka Tuai Akim Sabah enggau Sarawak Tan Sri Dato Sri Panglima Richard Malanjum ti mega ukai baka dipadahka Menteri Tugas-Tugas Khas Tan Sri Datuk Amar Adenan Satem maya nyimpul jurai.
“Tuai Akim Sabah enggau Sarawak (Malanjum) dalam pemutus sukung iya madah Temuda, Pulau Galau enggau Pemakai Menua endang tanah NCR di Sarawak.
“Tu penyaru dalam penemu perintah diatu,” ku iya ba aum pengarang berita di bilik Media DUN ti disempulang Ali Biju (PKR-Krian), pengudah Adenan nyimpul jurai maya Aum Kunsil Nengeri (DUN) ba Kompleks DUN ditu kemari.
Baru mega bepenemu Adenan bisi penyaru maya iya nyebut pasal kes Bisi anak Jinggot v Superintendent Tanah enggau Survei Bagi Menua Kuching enggau bukai kena iya nekanka penemu iya nya tanah NCR semina temuda aja.
“Kes Bisi Jinggot pasal tanah temuda sekalika ulih dijual ngagai raban bansa Iban bukai lalu nya meh isu ba kot laban kitai enda ulih ngereja pengawa nya.
“Nyebut pekara tu salah laban kes tu ti endang kes kot menua besai, asal iya ditulak ulih Kot Apil (CA).
“Kot Apil nyengala nulak penemu nya laban sida ngumbai tanah NCR di Sarawak semina tanah temuda aja, lalu penemu tu enda betul,” ku iya.
Berindik ari tu, Baru minta perintah betemu enggau Malanjum laban “iya (Malanjum) endang orang ti pemadu enda bechiping merijaku tangkan ngagai perintah.”
“Ba penemu aku perintah patut minta penerang ari iya ngambika perintah bisi penemu ti enda bechiping dalam pekara tu,” ku iya.
Dulu ari nya, Adenan lebuh ti nyimpul jurai madahka ADUN Ba’Kelalan minta Opis Ketuai Luya Menua Sarawak mansutka Perambu Ubah Undang-Undang kena ngubah Kanun Tanah ngambika nyerangkung Pulau Galau tauka semua Pemakai Menua dalam reti ‘Tanah Adat Bansa Asal Bumiputera’.
Perintah deka nitihka pemutus Kot Menua Besai kena 12.07.2013 ti madah NCR ulih digaga tauka diulih sereta dijadika pesaka orang menua ngena dua chara aja.
Chara keterubah iya nya nebang kampung bungas, nanam utai lalu semampai diau ba tanah kena nyaga enggau ngulihka hak ba atas tanah nya ti dikumbai temuda, ku iya.
“Enti ADUN Ba’Kelalan deka ngubah undang-undang lalu iya ngasaika diri bisi sukung dalam DUN, iya patut ngenataika Rang Undang-Undang Ahli Peribadi (Private Members Bill) ngena nama iya empu ngambika ubah ulih digaga,” ku iya.