KUCHING: Menteri Tugas Khas Tan Sri Datuk Amar Adenan Satem (gambar) madah, naka bulan Oktober 2013, Opis Tanah enggau Survei (JTS) udah nerima 583 peminta ngambika Tanah Adat Bansa Asal (NCR) sida disukat kelingi nengah Inisiatif Baru.
“Ari penyampau tu, 416 iti peminta mungkur pemesai 671,688 hektar (1,659,741 ekar) udah dikemendar disukat. Lalu 167 peminta benung diproses,” ku Adenan lebuh nyimpul jurai Aum Kunsil Nengeri di Kompleks DUN ditu pagi kemari.
Iya ti mega Menteri ba Opis Kepala Menteri nandu, pengawa nyukat kelingi ba 257 kandang endur ti mungkur pemesai 349,086 hektar (862,592 ekar) udah tembu dipejalai.
“Ari penyampau nya, bisi 187 kandang endur ti mungkur pemesai 239,292 hektar (591,291 ekar) udah digazet nyadi Rizab Gunasama Bumiputera (Pertanian) di baruh Seksyen 6 Kanun Tanah Negeri, lalu 121 kandang endur diserah ngagai ketuai raban bansa ari komuniti ti bekaul lalu 66 agi deka diserahka enda lama da.
“Insiatif tu udah meri penguntung ngagai semua raban bansa Bumiputera di Sarawak,” ku iya.
Berebak enggau nya ia madah ngagai orang ti minta disukat ngena chara seseiku, pengawa nyukat nya deka dipejalaika ba renggat kedua pengudah pengawa nyukat kelingi tembu lalu digazet di baruh Seksyen 6 Kanun Tanah Nengeri sereta enti udah sedia disukat.
“Pengawa tu udah nyata sereta dipejalaika nyukat lot seseiku pengempu tanah di Genturung Pendiau Skuduk enggau Genturung Pendiau Pisa di Bagi menua Kuching.
“Sepenyampau 544 iti surat tanah individu ti mungkur 330 pengempu tanah udah dikeluar,” ku iya.
Kelimpah ari nya Adenan madahka laluh 159 kandang endur ti udah dikemendar disukat kelingi bedau tembu disukat.
Nitihku iya, ari penyampau nya 56 persin (%) tauka 89 kandang endur ti mungkur 203,006 hektar betapi enggau penanggul maya pengawa nyukat benung dipejalaika.
“Tu nyengkaum 68 kandang endur iya nya peminta ngansak nyukat tanah ti lebih besai ari ke udah dikemendarka. Lalu 16 kandang endur mega bisi charutka garis entara enggau pangan diri.
Lalu ari lima kandang endur ke minta tanah disukat nengah chara seseiku di baruh Seksyen 18 kanun Tanah Negeri laban ti dikeruga sekeda piak ti nadai tanggungpengawa ti madahka tuju pengawa nyukat kelingi dikena ngerampas tanah hak adat Bumiputera ti diempu rayat, ku iya.
“Perintah nengah JTS deka chakah meri penerang pasal tuju ke bendar enggau penguntung nengah inisiatif nya,” ku Adenan.