KUCHING: Penusah ampuh bah, tanah tusur ke nyadi di Kelantan enggau Cameron Highland tau nyadi teladan ke manah ngagai menua Sarawak, ke lebih agi ba pengawa berimba kayu di menua tu, ti belabuh diteritka.
Menteri Datuk Patinggi Tan Sri Adenan Satem madah, enti penusah ke nuntung Kelantan enggau Cameron Highland nyadi, Sarawak deka betapi enggau penusah ke balat agi ari kededua buah nengeri nya, laban menua Sarawak tu besai.
“Kitai enggai nyadi baka di Kelantan tauka Cameron Highland, nya alai pengawa enchuri kayu ti dipejalaika sekeda orang nya ke bebendar iya, ulah ke amu ti ngujungka kitai tau dituntung penusah ke besai ”.
“Kitai enda tau enda nyaga rampa menua kitai. Nya alai, aku deka ngamatka jaku diri ti enda ngeluarka lisin kayu agi ”, ku Adenan madah ba aum media ti diatur ba opis Kepala Menteri di Dewan Kunsil Nengeri Baru ditu, kemari.
Taja pia, iya madah enda semua lisin kayu deka dikinsil.
“Dalam Aum Kunsil Nengeri ke diatur dalam bulan Mei tu ila, kami (Perintah) deka merambu deka ngubah ordinan nambah ukum ba sebarang pengawa ke salah baka nebang, bejual, import enggau eksport kayu batang enggau chara ke salah (enda dikemendarka)”.
“Bekaul enggau lisin ke dipegai kompeni kayu diatu, enti bisi sekeda endur nya enda ngeluarka asil agi ketegal engka endur nya kelalu bedarung tauka kurang kayu, kami deka ngemunaska sebagi ari pekara nya dalam lisin kayu lalu nyilih nya ngagai ‘Totally Protected Area (TPA)”.
“Nya alai, ba endur ke udah dikelai TPA, enda tau alai berimba kayu agi ”, ku iya.
Naka ke diatu, pemayuh lisin kayu ti udah dikeluarka bisi dalam 572 iti,ke alai sebagi ari penyampau nya, lisin kayu ba Tanah Nengeri sereta (Permanent Foret Estates), 155 Occupational Ticket tauka OT enggau tanah paya enggau lisin kayu tebelian.
“Nyadi sebagi ari pengawa perintah deka ngemunaska pengawa enchuri kayu di menua tu, aku nadai agi ngeluarka lisin baru kayu di Tanah menua Nengeri (PFE)”.
“Nengah Lisin Kayu enggau OT ti ngeluarka tugung kayu menua tu ke manggai urung 9 juta cubik meter dalam taun 2014, ke dipelabaka umbas dikena ba industri kayu di menua tu, lalu laluh nya tau di eksport ”, ku iya.
Baka lisin OT ku iya, perintah nyadang deka nginsil lebih ari setengah lisin nya ke bisi diatu, lalu sekeda ke deka dikemaru, semina ulih diperundingka nitihka ‘merits’.
“Meresa sereta beratika lisin kayu ti diempu pemegai lisin nya setipak enggau tuju ngempung industri kayu, ngambika muntang dikemataka, sereta ulih ngurangka pengerusak rampa menua”, ku iya.
Taja pan industri kayu udah mai mayuh penguntung ba pemansang ekonomi enggau pemansang menua dalam kandang 90 taun tu ke udah, arapka pemansang ari industri nya mengkang dipajakka.
“Dikena beratika pemujur industri tu dalam taun ti deka datai, perintah deka nginsil sida tauka kompeni ke semina deka ngulih penguntung kediri empu aja”.
“Nya alai, penemu aku ti deka ngemunaska pengawa berimba kampung, bejual kayu tauka eksport enggau chara ke salah ba tisi undang-undang ngena lisin ke dipegai kontraktor, sub-kontraktor, perintah enda nangi deka neritka adat nyengkaum nginsil lisin nya”, ku Adenan.
Berindik ari nya, iya madah perintah udah belabuh neritka adat, nengah Opis Sarawak Forestry Corporation (SFC) enggau Opis Sarawak Timber Industry Corporation (STIDC) sereta sekeda ejensi perintah bukai .
“Semua sida ti bejalaika tanggungpengawa nengah ejensi tu udah disedia enggau sukung logistik, teknologi DRONES ngambika sida ngemunaska pengawa berimba kampung ti nadai kemendar, nyual tauka eksport nengah chara ke salah”, ku iya.
Baka ‘Occupation Ticket’ (OT) ku Adenan, Perintah mega berunding deka ngetu dulu meri lisin OT nitihka kes, ngambika ulih ngurangka lisin nya dikeluarka.
Naka 20 Januari tu tadi, Opis Kampung Sarawak udah ngerampas urung 2,690 batang kayu enggau penyampau 2,000 meter padu ti dipelabaka berega urung RM1 juta.
Pemayuh kes berimba kampung enggau chara ke salah bisi 8 iti kes, 3 kes iti di Kuching (seiti kes di Serian, Padawan enggau Sematan). Di Bagi Menua Sibu bisi 3 iti kes (seiti kes di Belawai, Mukah enggau Sarikei, lalu di Bintulu bisi seiti kes di Tatau enggau seiti kes di Bakong, Miri.
Bela bisi nguluka aum media nya, Menteri Pengatur Pemansang Pengeraja Asal enggau Rampa Menua Kedua, Datuk Amar Awang Tengah Ali Hassan enggau Menteri Muda Rampa Menua Datu Len Talif Salleh.