SIBU: Stanley Geramong Bandar udah dichiri nyadi Temenggung sitak Sibu nganti penuduk Sir Adrian Ringgau.
Menteri Kunsil Kandang Menua enggau Pemansang Raban Bansa Dato Sri Wong Soon Koh udah nyuaka setipikit nyadi Temenggung ngagai Stanley ba Opis Pelilih Sibu ditu, kemari.
Pengawa nya dikemata Sekretari Politik Kepala Menteri Andrew Shilling, Pemangku Residen Sibu Sapiah Daud, Pemesai Pelilih Sibu Wong Hee Sieng enggau bala penghulu ke bukai.
Soon Koh ba jaku iya madah, pengawa nyirika Stanley bepun ari jaku pemutus Kepala Menteri Datuk Patinggi Tan Sri Adenan Satem ke bela disetuju sapit iya, Datuk Patinggi Tan Sri Alfred Jabu Numpang.
“Enggau tu, aku ngarapka semua tuai raban bansa ba sitak Sibu bekerejasama enggau Temenggung Stanley ngambika bela besaup nempa pengelikun pengidup rayat seraya napi pemansang ke bukai,” pia ku iya madah.
Soon Koh mega pechaya Temenggung Stanley ulih mangku tanggungpengawa baru nya bepun ari peneleba ke udah lama nyadi pemancha sebedau tu.
Dulu agi ari nya, Wong Hee Sieng ngarapka tuai raban bansa Iban ba sitak tu ulih begulai sereta bekerejasama enggau pangan diri ba tuju ngangkatka pengidup rayat ngambika enda tinggal pemansang ari orang bukai.
Nambahka nya, ku iya, tuai raban bansa megai tanggungpengawa ke besai nyadung polisi perintah ngagai rayat.
Stanley, 57, peranak menua Sungai Engkalat, Batang Igan sebedau tu kala nyadi Tuai Rumah ba menua sida sebedau dichiri nyadi pemancha dalam taun 2012 suba, nganti penuduk Ex-pemancha Wilfred Kiroh.
Maya berandau enggau pengarang berita, iya madah nengah pengarap ke diberi ngagai iya mangku tanggungpengawa nya enggau manah ulih nyintalka agi penyerakup bansa Iban.
“Pia mega aku ngarapka semua ketuai raban bansa Iban ulih begulai enggau semak agi ke lebih agi pegai sitak Sibu baka pelilih mit Selangau enggau Kanowit,” pia ku iya seraya madahka diri semampai deka mendingka penemu orang sebedau ngaga pemutus enggau chara profesionyel.