KUCHING: Gerempung Dayak National Sarawak (SDNU) Samarahan ngembuan juluk deka ngerejista mayuh agi kaban beserimbai enggau Karnival Mini Main Asal ke deka diatur kena 13 Disember 2014, berengkah pukul 7.00 pagi sereta tembu pukul 2.00 ngalihari ba Kampung Entinggan Jalai Meranek, Kota Samarahan.
Ketuai pampang gerempung nya, Stanley Belayong Pok arapka aktiviti ke baka ulih matak penatai ukai semina kaban gerempung enggau anak sida, tang mega bala Dayak ke bukai.
Semina kaban aja ulih ngambi bagi ba pekit ke diatur, taja pia orang bukai ke ukai kaban deka diberi peluang enti sema sida minta nyadi kaban, ba pekitke diatur kena Hari Enam minggu dudi nyin ila, pia ku iya madah apin lama ke udah.
Ku Belayong baru, seiti ari tuju ngatur karnival iya nya dikena ngintu main asal.
“Enti sema main tu endsa diintu, main tu deka punas nyerumba pemansang dunya moden. Mayuh bengkah perais ke manah bisi disediaka. Kami deka ngambi kaban baru maya nya ila ,” ku iya.
Entara main asal ti bisi dipekitka maya nya ila baka Batak Lampung, Pekit Nyumpit, Pekit Bowling Buah Nyiur, Pekit Mansuh, Pekit Main, Pekit Ai Tuak enggau Pekit Nyura Ke Anak Mit.
“Ungkup pekit nyumpit, pesereta dilalau main perengka sumpit kediri empu, lalu baka mega enggau pekit main darts. Aku meransang kaban komuniti Dayak ngemeratka pekit laban SDNU enggau sekeda NGO Dayak bukai ari Sarawak enggau Kalimantan Barat ukai semina naka ulih deka ngintu main asal tang mega ngelakuka iya nyadi main ngambika tebilang baka main moden,” ku Belayong.
“Dikena ngulihka belanja mimit, SDNU Samarahan deka ngatur pengawa belagu ke dipelanja, enggau rega ke patut seiti lagu. Kelimpah ari nya mega bisi pengawa nyabut tikit benasit. Aku mega nesau sesapa ke bisi ati tau bejualka pemakai enggau ai irup maya karnival nya ila,Sukung ari kita beguna amat ba kami,” ku iya.
Penerang ke silik tau ditanya ngagai Belayong nengah lumur 019-8895695; David Emai (013-8012830); Kaunsilor Tuai Rumah David Jiku (011-31816968) enggau Japnam Li (019-4692189).