TATAU: Program Membara Patriotisme udah mujur diatur Opis Hal Ehwal Khas (JASA) Parlimen Selangau di Rumah Kanyan, Sungai Penyarai, Kakua empai lama ke udah.
Nyempulang nya mega diatur pengerami Ketuai Begulai enggau Rayat ke udah digulu urung 1,000 iku peranak menua nya.
Program nya udah di penyadika Menteri Muda ba Opis Kepala Menteri (Hal Ehwal Adat Bumiputera enggau Penan) Datuk John Sikie Tayai.
Berebak enggau nya,Sikie ke mega Kaban Kunsil Nengeri (ADUN) Kakus lalu nyuaka geran Projek Mit Pemansang Menua Pesisir(MRP).
Bisi enam iti Komiti Pemansang enggau Pengelikun Genturung Pendiau (JKKK) ba kandang DUN Kakus enggau ngemujurka program nya, ke alai penyampau ungkus belanja ke dikena ngatur program nya bisi RM113,000.
Kelimpah ari nya, bisi mega diatur pengawa nyuaka kad nyadi kaban Parti Rakyat Sarawak (PRS) sereta ngerejista pengundi baru dipejalaika Kaunsil Pengawa Bepilih (SPR).
Mayuh bengkah aktiviti bisi diatur nyengkaum pekit nyura ti berambaika leka jaku patriotik.
Tuju program nya diatur endur nerenak penyanyau ke menua seraya ngingatka pemerani bala bujang berani ti udah berambun nyawa ngetanka menua ngambika ulih merintah diri.
Bela bisi datai maya nya DO Tatau Nyurak Keti, Pemesai JASA Parlimen Selangau Elisa Jaboh, bala pengari ketuai ejensi enggau opis perintah sereta bala ketuai raban bansa.