SIBU: Nembiak pupu raban bansa ba nengeri tu bela ngasaika awak ti sebaka belajar berengkah ari umur ti biak.
Menteri Pemansang Pengintu Pengelantang, Orang Indu enggau Ruang Bilik Datuk Fatimah Abdullah madah, pekara tu bepun ari rikut semina sepersin aja nembiak Primari Satu ba serata nengeri tu iya ke enda kala belajar ba prasekula berengkah taun 2010 nyentuk ke diatu.
Ku iya, ba taun 2010, sepenyampau 2,205 nembiak Primari Satu tauka 5.47 persin ari 40,302 enda kala belajar ba prasekula.
“Penyampau tu nurun ngagai 4.88 persin tauka 2,055 iku nembiak ari 42,138 iku nembiak ba taun 2011. Ba taun 2012, penyampau tu nurun ngagai 2.75 persin tauka 1,107 iku nembiak ari 40,318 iku nembiak sekula.
“Taun tu, bisi 40,504 iku nembiak ba serata nengeri lalu semina 2.34 persin tauka 947 iku nembiak primari satu enda kala belajar ba prasekula,” ku iya maya ba aum media sepengudah bejadika Konvensyen Ke-8 Pelajar Prasekula ba Wisma Sanyan ditu, kemari.
Fatimah ti mega Kaban Kunsil Nengeri (ADUN) Dalat madah, perintah enggau naka alah bejalaika pengawa nangika nembiak ba nengeri tu bisi tinggal pelajar berengkah ari prasekula.
Tu nyengkaum nambahka agi penyampau tadika enggau prasekula bepelasarka peminta, pelin enggau puku.
Iya madah, kelimpah ari Opis Pelajar Nengeri (JPNS), ijinsi ke bisi kaul numbuhka tadika enggau prasekula iya nya baka Opis Pemansang Raban Bansa (KEMAS), Opis Penyerakup Menua enggau Intergrasi Bansa (JPNIN) kelimpah bisi premis kediri ti direjister ari baruh JPNS enggau Opis Pengintu Pengelantang Nengeri Sarawak (JKMNS).
“Naka ke diatu kitai udah bisi 78,544 iku nembiak ari 3,118 buah tadika.
“Ari penyampau tu 1,085 buah tadika dipejalaika JPNS, JPNIN (172 buah), KEMAS (1,479 buah) enggau JPNS (382 buah).
“Pia mega bisi 2,614 iku nembiak besekula ba 140 buah prasekula ke dipejalaika JPNIN, KEMAS enggau prasekula ke direjister ba JKMNS.
Berebak enggau nya mega, iya madahka konvosyen nya deka belabuh ari 1 November ngagai 3 November tu ba RH Hotel.
Program nya berambika jaku ‘Harmonious Sarawak, Prosperity for All: Meeting Children’s Need for Quality Education’ lalu disadang deka digulu 400 iku pengajar tadika enggau prasekula.
“Bisi tiga iti keretas kereja deka dibantai maya tu iya nya ‘Quality Preschool: A Multi Cultural Perpective, Developmentally Appropriate Practices (DAP) when inculcating Cultural Harmony oleh Dr Siti Zaleha Redua dan Children’s Right To Be Children in Preschool’.
“Kelimpah ari nya bisi enam iti worksyop bela bisi diatur maya tu baka ‘Right to be heard’, ‘Right to play’, ‘Right to health and security’, ‘Right to learn’ (to go to school for free, to play & to have an equal chance to develop yourself), ‘Right to be taught in one’s mother tongue’ enggau ‘Right to individualized attention’,” ku iya sambil madahka program nya deka dipenyadika Kepala Menteri Pehin Sri Abdul Taib Mahmud ba hari keterubah.
Bela bisi datai maya aum media tu iya nya Menteri Pemansang Ruang Bilik enggau Pekara Pelajar Anak Mit Rosey Yunus enggau Residen Sibu Sim Kok Kee.