KELAI KITAI MERINTAH DIRI: Ugak (tengah) nyuaka ‘Jalur Gemilang’ ngagai D.O Kapit, Elvis Didit ti ngarika semua opis perintah nengeri ditu.
KAPIT: Kaban Parlimen Ulu Rajang, Wilson Ugak Kumbong udah diberi basa bejadika kimpin Ngitang Jalur Gemilang renggat pelilih Kapit beserimbai enggau atur pengawa nyambut Hari Merdeka ti Ke-56, ke berambaika leka jaku ‘Malaysiaku Berdaulat Tanah Tumpahnya Darahku’ ba Komplek Negeri di Jalai Bleteh kena Hari Lima minggu tu tadi.
Kimpin nya pejalaika sereta ba serata menua Malaysia kena 16 Ogos, ke alai tikas Nasional dipenyadi ba Ground Zero, Sungai Petani, Kedah.
Lebih 300 iku ngarika 47 ijinsi perintah, gerempung ukai dikuasa perintah (NGO), sektor korperat, kelab enggau gerempung di Kapit ngambi bagi maya atur pengawa nya, ke berengkah pukul 7.00 pagi.
Lebuh bejaku maya bejadika pengerami nya, Ugak minta mensia mayuh enda ngira bansa, adat, penemu enggau jalai pengarap ngayanka penaluk ngagai menua Malaysia.
“31 Haribulan Ogos nya hari ke besejarah dikena ngingatka Penumbuh Malaysia berengkah merintah diri. Tu meh maya kitai mandangka penaluk enggau pengangkun kitai ke menua. Penaluk tu patut datai terus ari ati kitai empu laban utai bukai ke lebih berega ari pengelikun enggau pengelantang di menua tu.”
“Kena mandangka pengankun enggau penaluk kitai ke menua, kitai patut bebasaka ‘Jalur Gemilang’. Aram meh kitai sama ngitang Jalur Gemilang ba rumah, opis, kedai enggau kerita kena mandangka kitai tu taluk, berakup, berani sereta bisi integriti kena ngidupka penaluk 1Malaysia”, ku Ugak.
Iya mega ngelalau rayat chakah ngetanka menau laban pengawa ngulihka menua merintah diri tu berat sereta berambunka nyawa.
“Lebuh ke chakah ngulihka menua merintah diri, mayuh bala ketuai kitai betapi enggau pemar baka Menteri Besai Malaysia ke terubah, Tengku Abdul Rahman, Tok Janggut, Tok Bahaman, Datuk Maharajalela, Rentap, Rosli Dhoby enggau sekeda bala ke bukai. Rebak ke diatu enggau nembiak rebak ke dudi patut nyendiaka diri megai tanggungpengawa ke besai ngetanka menua tu belama ” ku Ugak.
Ku Ugak nandu, dalam kandang 56 taun menua tu udah merintah diri, menua Malaysia udah balat endar mansang. “Menua Malaysia tegap ari segi ekonomi, politik sereta likun ke nyadi kunchi ngambika kitai semampai ulih ngasaika asil merintah diri”, ku iya.
Beserimbai engagu nya, Ugak nyuaka Jalur Gemilang ngagai sekeda ijinsi perintah enggau komuniti.
Opis Perintah ke nerima menira maya nya D.O Kapit, Elvis Didit, pemesai polis Kapit, Inspektor Fauzan ngarika opis perintah besai, Pengulu Uga Esop ngarika ketuai raban bansa ke bukai, Anthony Jalin Manggie ngarika sektor korperat enggau NGO lalu Konsilor Jantai Maseng ngarika bala Konsilor di Kapit.