NITIH TU: Fatimah beratika bup tusun program ke deka diatur maya International Conference of Cognitive Science tu ila. Bela dipeda (ari kanan) Dr Shahren, Philip enggau Suaidi.
KUCHING: Universiti Malaysia Sarawak (UNIMAS) deka ngatur ‘International Conference of Cognitive Science’ (ICCS) berengkah 27 nyentuk 30 Ogos 2013 ba sebengkah hotel tebilang ditu.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah deka bejadika aum nya kenaka 28 Ogos.
Bejaku ngagai pengarang berita pengudah nerima penemuai raban lecturer ari Fakulti Sains Cognitif UNIMAS ngagai opis iya di Baitulmakmur Petra Jaya kemari, Fatimah madahka aum pengelama tiga hari nya deka meri penerang ngagai mensia mayuh senentang guna untak kitai mensia.
“Aum tu mai reti besai ke alai deka ngempuru semua raban ke landik, bala profesor bejuraika guna bekenaka untak ba tiap pengawa sereta runding kitai.
“Enti kitai ulih bekenaka untak ba tiap pekara, kitai ulih ngintu disiplin diri sereta mutarka mayuh pekara enggau mudah,” ku iya seraya ti madah aum renggat entarabangsa ti diadu dua taun sekali nya keterubah iya diadu di Malaysia.
Entara raban ke nemuai iya nya Dekan Fakulti Sains Cognitif Associate Profesor Dr Shahren Tun Ahmad Zaidi Adruce, Sapit iya Philip Nuli Anding enggau Senior Lecturer Suaidi Otet.
Ba penerang iya ngagai pemberita, Dr Shahren madahka aum nya ila deka bejuraika 142 bengkah keretas kereja enggau 40 buah poster.
“Aum ti keterubah iya diadu di Malaysia tu ila deka ngundang raban penyereta bela ari dalam enggau luar menua.
“Sepenyampau 75 persin ari keretas kereja deka dipejurai penyereta ari luar Malaysia lalu laluh 25 persin dipejurai penyereta ari menua kitai nyengkaum ari Semenanjung Malaysia,”ku iya.
Iya mega madah tikas pengulih kereja tiap iku kitai ulih ditiki tinggi agi enti kitai ulih bekenaka untak enggau chara ti maksima.
“Ngelamatu kitai kelalu ngemerat pengering tubuh tang kitai jarang fokus senentang chara berunding ngagai ikas maksima,’ku iya.