KUCHING: Penyampau kes nyamah diri sebilik ti dirikutka di Sarawak dua taun sebedau tu nunjukka penambah.
Menteri Pemansang Orang Indu, Ruang Bilik enggau Raban Bansa, Datuk Rohani Abdul Karim madah, orang ti napi penanggul nyamah diri sebilik nya nyengkaum orang indu enggau lelaki.
Nitihka riput, iya madahka kes nyamah diri sebilik nyadi ari mayuh macham tegal.
“Penyampau kes nyamah diri sebilik di Sarawak dua taun sebedau tu iya nya taun 2011 bisi ngerikutka 247 kes lalu penyampau nya nambah ba taun 2012 ti ngerikutka 280 kes.
“Taun tu nyentuk ke bulan April 2013 dirikutka 60 kes nyamah diri sebilik di Sarawak.
“Bepelasarka statistik nya tebal agi kes tu nyadi tebal agi ketegal besengki jaku, ninding penanggul belanja, mabuk, penanggul anak, gian dadah, sereta mayuh tegal bukai,” ku iya seraya madahka statistik nya bepelasarka rikut polis.
Rohani ngenang pekara nya dalam aum pengarang berita ba pengerami Rumah Terbuka Hari Raya 2013 iya sereta Opis Menteri Pemansang Orang Indu, Ruang Bilik enggau Raban Bansa ti diatur ba Borneo Convention Centre Kuching (BCCK) ditu kemari.
Bejaku baru iya madah, nitihka statistik kes nyamah diri sebilik ti nyadi di serata menua (Malaysia) ba taun 2011 bisi 3,277 kes lalu ba taun 2012 bisi 3,488 kes.
Serata menua nyentuk ke bulan April 2013 bisi 1,353 kes nyamah diri sebilik dirikutka, ku iya.
Nya alai ku iya, dikena nyeliahka penanggul nya majak nyadi, opis menteri udah ngatur mayuh bengkah program nyengkaum meri kaunseling ngagai orang ti baru deka nirika ruang bilik.
Entara program diatur iya nya kursus ruang bilik dibaruh LPPKN ti nyerangkung chara ngurus belanja enggau ke bukai, kelimpah ari nyendiaka kursus ngagai apai indai ti bekereja, ku iya.
“Nambahka nya kami mega ngatur seminar ungkup orang lelaki laban kitai deka nemu nama tegal kes nyamah diri sebilik tau nyadi. Kami nerima timbal ti manah ari program tu,” ku iya.
Kelimpah ari nya lebuh ditanya isu bekaul enggau raban bansa Penan, Rohani madahka, iya deka betemu (turun padang) sereta mansik baru pekara Penan sebedau Menteri Besai mantaika Bajet 2014 kena 25 Oktober 2013.