SIBU: Penanggul ai di kandang endur Jikang ba Jalai Kanowit/Julau/Durin ditu udah balat nyima ati peranak menua nya.
Ketuai Indu Parti Rakyat Sarawak (PRS) Bukit Assek Lolita Duli madahka nadai setitik ai pansut ari paip ba rumah iya kenyau ari Hari Lima tu tadi.
“Aku enda ulih ngetat ati agi bekal ai semina bisi ari pukul 1 ngagai 4 pagi ninting hari.
“Tang diatu paip ai rangkai lalu kami agi mengkang bebayar RM20 ninting bulan dikena mayar bil,” ku sebana iya.
Iya madahka bisi udah ngaga kumpelin ngagai opis ke bekaul tang sampai ke diatu sida ke alai manggaika ke utai baka ke nadai didinga.
Iya beratika penanggul nya berengkah sebedau Gawai Dayak taun tu tadi.
Ari bulan Mei sampai ke diatu, sida bepanggai ba ai ujan enggau ari sungai ke dipeguna besehari-sehari.
Sida ke bisi entukar nyamai mimit laban ke ulih ngambi ai ari tamu di pasar Julau, ku iya.
“Tang diatu sungai Jikang enggau Bulat nyau langkang laban hari kemarau.
“Ai nya kamur alai mandi tang ga nadai pilih bukai,” ku iya.
Iya nambahka petunggal iya sakit udah ke ngirup ai diambi ari sungai.