KUCHING: Program Jualan Khas Pasar Tani Aidilfitri ti diatur dua hari berunggu berengkah kemari, ulih ngelaku sereta ngenyungkak seraban 128 iku orang dagang mit di Medan Niaga Satok.
Program ti diatur Kunsil Dagang Betanam Betupi Perintah Besai (FAMA) dipenyadika Menteri Kereja Raya, Datuk Fadillah Yusof diatur ba Medan Niaga Satok ditu kemari.
Kelimpah ari ngenyungkak penatai pemisi pedagang mit iya madah, program bejual nya mega meri penyenang ngagai orang mayuh lebih orang ti megai pengarap Islam ti deka bebeli sereta nyimpan barang dikena berami Hari Raya Aidilfitri.
“Senipak enggau kandang endur (Medan Niaga Satok) tu dipegai Parlimen Petra Jaya, kitai beterima kasih ngagai FAMA laban ti ngatur program tu ke nyendiaka penyenang ngagai mensia mayuh sereta seraya ngelakuka dagang raban penyual di Medan Niaga Satok,” ku iya ti mega Kaban Parlimen Petra Jaya lebuh dikerandau pengarang berita kemari.
Nambahka nya, Direktor FAMA Nengeri, Paza Dan lebuh dikerandau ba program ke sebaka madah, juluk program nya diatur kena ngemuntangka penguna bebelika barang ti agi baru, bisi kualiti sereta rega ti patut.
“Pengudah nerima timbal ti manah ari penguna, FAMA nengeri taun baru deka ngerembaika program sebaka ba mayuh agi pasar tani di serata nengeri,” ku iya.
Kelimpah ari diatur di Medan Niaga Satok, program ti sebaka mega bisi diatur Pasar Tani Semarak, Pasar Tani Bandar Baru Samariang enggau Pasar Tani MJC, lalu di luar Kuching semina diatur di sibu enggau Miri.
Berebak enggau nya, Paza mega ngaku sekeda rega barang ke dikemataka perintah nyerumba Hari Raya Aidilfri di menua pesisir nengeri tu bisi niki mimit.
“Aku enda ngenggai asil pengawa pemansik tauka pematau FAMA, kami tetemuka sekeda barang ti kena sekat perintah rega bisi niki mimit, dibandingka enggau rega siling lalu nya ketegal ungkus pengangkut.
“Taja pia tikas rega ke ditikika nya enda kelalu mar,” ku iya.