SIBU: Lanting Matahari, 51, enda setuju enggau perambu Kumpulan Wang Simpanan Pekerja (KWSP) ke enda ngemendarka kaban KWSP mansutka semua duit ari akaun sida udah umur manggai 55 taun.
Ku iya, perambu KWSP ke benung dipejalai nengah kimpin ‘Golden Years’ nyentuk ke 2 Ogos tu enda masuk akal.
Ba baruh Skim Pengeluaran Fleksibel Umur 55 taun, kaban ulih milih mansutka sebagi ari akaun simpan sida, ninting bulan tauka kededua nya.
Lanting madah, iya enda setuju enggau sekim nya lalu ketegal ke nyadi kaban sida ngembuan hak enti deka mansutka semua penyampau duit dalam akaun sida.
Tandu iya, perintah ke bejalaika kimpin nya ngambika raban orang tuai umur ulih nyimpan duit sigi manah.
Taja pia, iya pechaya nya barang ku kaban KWSP ngena duit nya nitihka peneka ati sida udah ke pinchin.
“Nya duit aku, lalu aku ulih ngena duit nya sepeneka ati aku empu. Aku tau mansutka semua duit nya lalu nyimpan iya ba bank.
“Nya pilih ke engkeman, ukai semina ungkup diri tang mega ruang bilik aku empu. Bala anak mega bulih penguntung ari duit ke disimpan dalam bank,” ku iya.
Iya madah mayuh kaban KWSP ke bukai nyukung sereta sepenemu enggau iya.