NAKA ULIH: Raban Bomba enggau naka ulih madamka api ke ngeretungka rumah dua iku diri menyadi di Kampung Semadang kemari.
KUCHING: Dua iku diri menyadi nadai agi endur diau pengudah rumah sida di Kampung Semadang, Jalai Puncak Borneo angus empa api, kemari.
Rumah seduai, Jodi Rasah, 66 taun enggau menyadi iya, Yem Rasah berumur dalam urung 50 taun iya belabuh empa api urung pukul 11.30 pagi.
Nitih ku jaku bini Jodi, Yati Giman, 61, madah maya nya nyadi, semina iya enggau dua iku uchu iya ke berumur 2 enggau 3 taun aja di rumah.
Kededua uchu iya maya nya ba bilik sebuah, ku iya, lebuh kededua uchu iya pansut ari bilik nya laban penuh enggau asap.
“Api nyerarai enggau jampat datai ke kami enda sempat ka ngangkut barang enggau dokumen bukai pansut ari rumah,” ku iya madah lebuh dikerandau ba alai rumah sida iya ke angus, kelimpah ari madah semina sempat mai bala uchu iya pansut ari rumah nya.
Ba pekara tu mega, Komander Operasyen Bomba enggau Penyah Penusah, Siburan PBK II Albanus Linyan, madah sebuah injin enggau 13 iku raban pengerara api beguai ngagai endur nya ke datai dia dalam urung 11.31 pagi.
Bomba enggau Penyah Penusah Siburan sama bisi dibantu tujuh iku raban Bomba ari Kota Samarahan betuaika PBK II Kam Liman.
“Kami betapi enggau tusah ngulihka ai taja pan bisi pili bomba di kampung nya.
“Nya alai kami nadai chara bukai tang ngepam ai ari pegong ikan ke besemak enggau nya, ke dalam 150 kaki ari endur rumah ke angus,” ku iya.
Berindik ari penusah nya, rumah ke alai sida Yem diau, balat endar empa api dalam 100 persin angus enggau rumah menyadi iya, urung 75 persin angus mujur dikemutarka dalam urung pukul 12.57 tengahari.
Pengawa madamka api nya mega sama dibantu orang di genturung pendiau dia.
Kebuah enggau ungkus pengerugi agi benung ditasat.