Anak ke bepelajar ngembuan runding ke tinggi sereta ulih mujur dalam pengidup dudi hari
// Dikarang Judan Bungap //
SELAMAT DATAI YB: Penatai Gira disambut enggau adat asal Iban ngulu pengerami sekula nya, empai lama tu tadi.
SIBU: Sukung apai indai endang beguna ngagai bala pengajar dikena sama nyungkak pelajar bala nembiak sekula, ukai semina ngembuan penemu tang landik ngidupka diri dalam pengidup, pia ku Kaban Kunsil Nengeri (ADUN) Tamin Ir Christopher Gira.
Iya madah munyi nya rambau bejadika Pengerami Tanda Basa Penyulut Nembiak (AKP) Sekula Sekondari (SMK) Luar Bandar Sibu ditu, kena Hari Lima minggu ke udah.
Gira ti mega kala besekula dia ba taun 1988 menya ngena awak tu nerangka pemesai reti sukung bala apai indai nembiak ngagai pengajar enggau sekula.
“Saup bala apai indai beguna bendar ngagai bala pengajar ngambika muntang agi ngajar nembiak sekula lalu nempa pemujur ba pelajar sida,” pia ku iya madah maya nya.
Pengerami tu bela digulu Prinsipal sekula nya Wong Teck Ling enggau Chairman Gerempung Apai Indai enggau Pengajar (PIBG) sekula Liang Mikui kelimpah lebih 300 iku bala apai indai nembiak sekula nya.
Berebak enggau tu mega, iya minta nembiak sekula ngemeratka pemujur ba pelajar Jaku English ke endang ditemu beguna dikena besemekih ngulihka pemujur maya rama diatu. Berindik ari Jaku Inggeris diatu endang dikena ba serap dunya, lalu ngembuan penemu dalam jaku tu enda salah kena ngemansangka diri seriris enggau raban bansa bukai di dunya tu.
Ba pengerami tu, Gira besemaya meri geran RM30,000 ngagai sekula nya ti mungkur dikena ngaduka pengawa baka ngechat sekula, ngaga pagar enggau meri seiti PA System.
Kelimpah nyuaka perais enggau setipikit ngagai bala nembiak, iya mega maya tu dipebasa melah kek dikena ngelai ngintu hari pengada iya.