KUCHING: Opis Menteri Pengintu Pengelantang, Orang Indu enggau Komuniti minta sapit penawa raya muka baru kes majau ke udah ditutup pengudah indu ke dibajau nyadi bini orang ti ngayahka iya.
Menteri opis nya, Datuk Fatimah Abdullah madahka kes patut dibuka baru lalu orang ke ngereja ulah nya diukum ketegal penyalah nyadi sebedau seduai jadi melaki bini.
“Kitai ngansak sapit penawa raya muka baru kes lalu orang ke ngereja ulah nya diukum. Penyalah dikereja sebedau seduai jadi melaki bini.
“Ulah nya mengkang salah lalu patut diukum,”ku iya nengah seiti surat penerang berita kemari.
Netapka ulah nya seiti penyalah ke berat, Fatimah madah komuniti enggai meda kes tu nyadika jalai sida ke ngereja penyalah ke sama ngerari diri ari ukum jemah ila.
Ku iya, bisi udah nyadi kes dulu suba ke alai penawa mengkang bejalai dawa lalu kitai enggau nyemetak minta atur tu diguna sekali agi.
Kena 27 Julai 2016, Kort Seksyen ngelepaska Ahmad Syukri Yusuf ,28, ari dua tuduh majau seiku indu ti beumur 14 taun ba bulan Oktober 2015. (Bajau – vb majau – masung lalu ngulihka tubuh indu, Bup Sereba Reti jaku Iban TJF 2011).