PEDAS ngasaika mayuh raban nya empai temu rita taja kala enggau bedengah rambau menua agi siga
// Dikarang Judan Bungap //
SIBU: Serakup Dayak Sarawak (PEDAS) minta perintah chakah agi nyidi bala bujang berani ti kala berambunka nyawa ngulihka pengelikun menua tu kelia ngambika raban tu bela ampit magang ngasaika nama ke patut diberi dikena ngelai ngenang budi sida.
Sekretari Besai PEDAS Bill Kayong madah, iya pechaya agi mayuh bala bujang berani ba nengeri tu empai ditemu rita taja sama bela kala baka orang bukai ngemunaska munsuh rambau menua agi siga.
“Nya alai, serakup kami andal amat piak ti bekaul anang enda lengkas nyidi raban tu diumba umur sida nyau majak tuai.
“Kitai ngasaika sida patut diberi enggau pemeri ke setimpal ngagai nama ke udah digaga sida suba,” pia ku iya maya berandau enggau pengarang berita ditu, kemari.
Bill mantaika penemu tu sepengudah iya nerima berita ari Edward Eddy Jaroh ti madahka apai iya Jaroh Saluat kala nyadi Pasukan Polis Hutan (PPH) tang nyentuk diatu empai dikeibuhka perintah enggau patut.
Jaroh peranak asal Nanga Delok, Lubuk Antu dipadahka kala bedengah munsuh dalam taun 60 ngagai 70-an menya.
Ngenang pemerani Jaroh, ku Bill, Jaroh ti kepenudi iya megai pangkat Sarjan kala bedengah enam iku munsuh lalu mai pala sida enam nya ti nyadika kelai pemerani iya.
Kelimpah ari nya iya mega suah bendar enggau pengawa ngemunaska munsuh nyentuk bela bisi enggau nangkap ketuai Komunis Sarawak Bong Kee Chok.
Jaroh badu gawa ba taun 1996.
“Tang sayau bendar bujang berani baka tu lalu empai nerima nama patut ke diberi ngagai iya baikka baka bantu tauka kelai gelar dikena ngenang pemerani iya suba.
“Kami ari PEDAS minta perintah ngenang semua pengawa ke udah digaga Jaroh tu,” ku iya madahka baru.
Jaroh diatu mengkang regas sereta agi kering diau ba No 181, Lot 255, Lorong B3, RPR Batu 12, Jalai Kuching-Serian.
Iya mega tau digiga nengah lumur telefon rumah 082-616 142.
Ukai semina Jaroh, Bill andal amat perintah nambahka agi pengawa nyidi bala Sarawak Ranger ke bukai iya ke endang ditemu diatu nyau udah tuai kelimpah bisi mega nadai tentu likun pengidup.