KUCHING: ‘Attorney General’ enda sengapa ngirit orang ngagai kot bepelasarka asai ati diri tauka bepun ari runding sereta penemu mensia mayuh.
Nitih penerang Sapit Menteri Dalam Menua Datuk Wan Junaidi Tuanku Jaafar, rayat patut sabar lalu enda nuduh sengapa enti sesebengkah kes enda dipechara di kot.
“Kitai enda ulih nitihka asai ati diri lalu sengapa ngirit orang ngagai kot. Kitai patut ngembuan chukup penerang tauka bukti enti deka ngirit seseiku orang bechara,” ku Wan Junaidi madah ngagai pemberita di Opis Servis Parlimen Santubong kemari.
Iya madah, enti sesebengkah kes dibai ngagai kot tang udah nya dikinsil, pekara nya tau bendar mandangka attorney general nya enda nemu gawa.
Iya nerang, atur mai kes ngagai kot begunaka surat pansik ti dipejalai raban polis lalu diserah ngagai attorney general ti deka nyerenih tauka mansik semua penerang ba dalam surat tauka ripot nya.
“Pengudah nerima surat pansik ari polis, attorney general nya deka beratika asil pansik lalu nentu sekalika penyalah ke diripot nya ngelanggar undang-undang tauka enda.
“Enti penyalah enda ngelanggar undang-undang, polis diberi kuasa meri jaku ajar ngagai orang ke dipelaba ngereja penyalah nya tadi ngambika iya enda ngulang pengawa ke udah,”ku iya.
Ngenang senentang isu MP Seputeh, Teresa Kok ke dikejaku ngelesi Menteri Besai enggau perintah nengah jaku “Onederful Malaysia” rambau pengerami Taun Baru China tu tadi, Wan Junaidi madah, iya deka meratika dulu isi video enggau riput ari polis.
Iya mega madah, tiap kaban parlimen diberi hak ke sama maya ke ngulu aum di parlimen tang sida bisi sekat diri ke udah ditetap.
“Nama aja pengawa nuan ba menua ti ngemeranka atur demokrasi, uji enda ngelui sekat ke udah ditetap. Tiap pengawa kitai bisi tikas pengulih enggau pengenda bepelasarka undang-undang menua,” ku iya.