SAUP KAMI: Seraban orang ke tasah nya nerima pemeri ari Hope Place.
KUCHING: Hope Place seruran ngamatka rambai jaku sida iya nya ‘Giving Hope Touching Lives’ lebuh pengereja pengawa pengasih rama, Kelvin Wan nadai betangguh nyuaka bantu ngagai ruang bilik ke dituntung penusah angus di Sungai Apong kena Hari Minggu nyin tadi.
Orang tu udah dituntung penusah angus kena hari kedua ngintu pengerami Taun Baru China, ke alai lapan buah rumah udah retung laban api di Sungai Apong.
Pengudah bulih lumur Hope Place ari media, orang ke tasah tu lalu ngaga kangau sereta minta bantu ke alai Kelvin Wan enda betangguh lalu nyuaka bantu pemakai baka beras, ai irup, ruti, mi bungkus, minyak makai, gula, garam, milo enggau pemakai dalam put ngagai lapan buah ruang bilik ke tasah ketegal penusah nya.
Hope Place tu sebuah gerempung ukai dikuasa perintah (NGO) ti nyuaka bantu ngagai ruang bilik ke tusah sereta enda bidik lansik nengah chara nyuaka bantu barang pemakai baka beras, minyak makai, gula, garam, ruti enggau mi bungkus.
Ungkup orang ti ngatika diri tauka sekeda ruang bilik ke ngembuan penatai pemisi ke mimit sereta semina chechukup diempa kena ngapuska bulan, sekali nganjung barang bantu pemakai enda kurang ari 178 kampit beras, ruti enggau mi bungkus, 167 bungkus milo enggau tepung tusu, 160 butul minyak makai, 160 bungkus gula enggau 80 bungkus garam.
Ba ruang bilik ke ngembuan anak tauka orang tuai ke sakit, kekadang sida begunaka ampin ke dikena udah nya dibuai.
Sida bisi nyuaka bantu meri ampin nya.
Hope Place meransang mensia mayuh enggau orang ke gerah jari ngemujurka juluk mantu orang ke tusah.
Sida ulih dikangau nengah lumur 013-567 2775.