KUCHING: Mayuh raban orang ngemataka pengawa menua Malaysia ngelakuka industri dagang temuai nyengkaum pemesai ari Gerempung Dagang Temuai Sedunya Pertubuhan Bangsa Bersatu (UNWTO), ti madahka menua tu nyadi champian ba pengawa ngelakuka dagang temuai.
Sekretari besai UNWTO, Taleb Rifai madah, menua Malaysia sebuah ari menua ke pemadu suah alai bala temuai nemuai sereta ngembuan penemu ti tau dipekunsi enggau menua bukai.
Iya mega muji Malaysia laban ke udah mujur nguna mayuh bengkah main asal pupu raban bansa, nyadika produk dagang temuai ti nyelai sereta ulih matak pengerindu.
“Menua Malaysia tau nyadi chunto ke manah, ke alai dagang temuai ulih nempa penyerakup rayat nengah penegap kedut 1Malaysia,” ku iya ngerandau media di luar Forum Dagang Temuai ASEAN 2014 ditu.
Ku Rifai, penemuai 25 miliun iku temuai dalam taun 2012, pemujur ti ngemegahka menua Malaysia laban nya ukai semina ngayanka pemujur ba kimpin dagang temuai, tang mega mandangka pengelikun enggau penegap ba menua tu.
Ku iya, pengelikun enggau penegap ukai aja beguna amat ba industri dagang temuai, tang mega nyadika pelasar nyapai pemansang ba ekonomi enggau pengawa rama.
Peluang gawa sereta penatai pemisi ke diulih nengah dagang temuai, ku iya ulih nyaup kena ngelikunka menua.
Ku Rifai ejensi PBB nya mega bisi ngatur program mutarka penanggul enggau penusah, lebih agi ba bidang penyambung, nyikap pemesai dagang temuai enggau pengelandik senentang chara mutarka penusah ke nuntung sesebuah menua. — Bernama