BISI PUANG, SAUP NGAGA: Dennis bediri ba mua Gerija St Francis seraya nyebut, tanah simpan ke puang nya bisi di belakang gerija.
MINTA SAUP MUTAR: Pemanjai rintai entukar ba kededua piak jalai maya kaban gerija besembiang kena Hari Minggu.
KUCHING: Gerija St Francis, Kota Samarahan minta ari piak ke bekuasa ngambika ulih mutarka penanggul ngaga mayuh agi palan paking kerita dikena nampung penambah kaban gerija.
Komiti gerija udah nemu palan ke tau alai ngaga paking nya, ba mua gerija Jalan Datuk Mohammad Musa ke ku sida ulih ngundan 60 tempat paking.
“Tanah simpan ba mua gerija nya manjai 180 meter lalu buka 14 meter nya umbas endur ngaga tempat paking,” ku Paderi ke Nguasa Reverend Dennis Gimang ngerandau The Borneo Post bedau lama ke udah.
Mina siti aja penanggul iya nya parit enggau munggu ke nyambung laman gerija enggau jalai besai.
Komiti gerija bisi udah merambu nimuk apak nya sebedau dipenyadika tempat paking kerita.
“kami nyadang melanja enda kurang ari RM200,000 ngagai RM300,000 ungkup tuju nya,” tambah iya.
Seraya nya, maya sembiang besai Hari Minggu urung 700 iku kaban gerija datai ngulu dua bengkah servis nya dalam Jaku Iban enggau English.
“Lebuh Hari Minggu kededua piak sebelah jalai alun jalai Datuk Mohammad Musa berintai alai tusun kerita paking lalu tu tau ngeruga pengelikun penguna jalai bukai,” tandu iya.
Ku iya penanggul ba paking balat agi lebuh maya gerija bisi ngatur aktiviti seraya Gerija St Francis bisi 12 bengkah chapel ari Sungai Tapang ngagai Asajaya di baruh kemata gerija nya.
Gerija nya mega nyadang mayuh agi kaban enti sema mayuh agi projek pengawa berumah tembu ba kandang endur dia.
Maya besembiang besai Hari Minggu tu tadi, gerija udah nebah ungkup projek ruang bilik ba genap pintu chara peneka ati diri, ni naka penyampau duit ungkup gerija.
“Kitai berengkah ari RM1,000 lalu dikeamatka nyerumba taun 2016,” ku Dennis nambahka, pan nya dikena nangkir tauka ungkup begagaka rumah gerija baru.