LANTANG BELEPA: Raban orang ke bemain ditu ngasaika penyamai belepa ngelaban kesuh angin ke seruran chelap seraya mendingka duru ai ari sungai ke besemak.
KUCHING: The Borneo Highlands Hornbill Golf and Jungle Club diatu ngelaluka mensia mayuh ti rinduka pengawa main golf masuk nyadi kaban kelab nya.
Nitihka berita ti dipansutka, semina 100 iku ti keterubah endar minta deka diambi nyadi kaban.
Borneo Highlands Resort ditumbuhka sebuah kampung tropika ke pemadu besai di dunya enggau di Malaysia ke mega nyadi palan eko-dagang temuai.
Borneo Highlands Resort tu mungkur pemesai 5,000 ikar, sebuah palan endur ngelantangka ati, ke semina 60 km penyauh ari Bandaraya Kuching, tauka sejam pejalai ngena kerita.
Semina orang ti dikangauka aja tau nyadi kaban kelab tu ke alai orang nya enda tau enda raban koperat tauka orang ngatika diri. Timpuh nyadi kaban nya ditetapka 2 taun aja.
Bayar nyadi kaban ngagai orang ti ngatika diri iya RM7,000 lalu RM12,000 ngagai raban koperat.
Kelimpah ari ke tau ngena perengka ba kelab nya nyengkaum The Jungle Spa, kaban kelab nya mega tau bemalam enda bebayar ngelama tujuh malam ba endur nya. Ungkup nya mega tau disilih enggau sekeda utai bukai nitihka sempekat ti udah ditetapka.
Peminta ngambi nyadi kaban tu laku dalam timpuh 6 bulan aja.
Resort tu mega ngembuan rampa menua sereta padang golf ke pemadu manah di menua tu.
Padang golf ke ngembuan 72 Par sereta 18 igi lubang nya udah dipenyadika Tiger Woods maya pengerami makai lemai di Palace Of The Golden Horses Hotel kena 18 November 1999.
Langkar resort ke udah menang gelar Hornbill Golf Course digaga seiku arkitek golf ari Selatan Australia ke benama Neil Crafter, setipak enggau pemanah rampa menua ba tanah tinggi, ngambika orang ke bemain golf dia ulih ngasaika penyamai angin ari rampa menua ba kampung.
Ba kandang kampung puang ke mungkur pemesai 5,000 ikar ti enda kala ditegu nya, orang ke datai kia ulih ngasaika penyamai enggau pemeresi angin serata ngemata pengadung bukit enggau kampung ke ngelingi palan nya.
Borneo Highlands Resort ngembuan 30 iti bilik ba rumah kelab nya sereta 10 iti bilik ba kabin.
Penyampau temuai ke datai kia besekat kena nyaga peninggi tikas servis sereta setindit eksklusif palan nya ke manah endur ngelepaka runding, tubuh sereta ngelantang ati.
Temuai ke datai kia mega tau beurutka tubuh sereta ngelepa runding sida nengah chara terapi enggau berubat chara lama bansa Bidayuh.
Gelar ke dimenang sida ti dikumbai Peso Perong theraphy nguna chara berubat bansa Bidayuh lama ke beurut ngena ubat urut ke digaga ari utai tumbuh dalam kampung, lada Sarawak sereta lia.