BN semampai mai pemansang lalu rayat enda patut tekuing runding nyukung penyakal
SERIAN: Menteri Pengereja Pengawa Datuk Richard Riot ngelalau rayat kelebih agi ba parlimen Serian bebasaka pemaik sereta pemansang ti udah dibai perintah Barisan Nasional (BN).
Ngenang senentang pemutus pengawa bepilih parlimen ke-13 (PRU13) ti baru udah tembu, Riot ke mega Kaban Parlimen Serian netapka dia rayat patut malas nya nengah chara ngundi BN.
“Taja pan menang ungkup keempat kali bejurut ba pengawa bepilih, aku enda lantang ati ketegal pemutus sekali tu mandangka rayat bisi nyukung parti penyakal.
“Parti Penyakal enda kala mai pemansang sereta enda kala mantu rayat di parlimen Serian ngelamatu, tang nama kebuah penyakal teulihka 6,000 undi ba palan muai undi Sekula Chung Hua Serian?.
“Engka raban tu enda nemu reti beterima kasih ngagai pemanah aku ti udah mayuh mantu sida iya ngarika perintah BN,” ku Riot maya bejaku ba pengerami nyuaka cek Projek Mit Menua Pesisir (MRP) di Balai Mensia Mayuh Serian kemari.
Tandu iya, MRP ke disua sehari tu asil ari pemujur BN ba pengawa bepilih lalu enti sema alah, rayat enda ngasaika agih duit nya.
Ba PRU13, Riot menang nengah majoriti 13,151 undi ke alai iya teulihka 19,494 undi, DAP bulih 6,343 undi lalu STAR bulih 390 undi.
Berindik enggau nya, Riot ngansak rayat ti udah tekuing runding lalu nyukung penyakal berunding panjai lalu mulaika diri ngagai BN ngambika program bantu perintah ke nyengkaum bantu MRP ulih mengkang diasai jemah.
“Pemujur aku (BN) ungkup penguntung semua rayat di parlimen Serian, program pemansang sereta bantu ke nyengkaum MRP deka diasai semua,” ku iya.
Sepenyampau RM699,000 diagih ngagai 77 buah gerempung dalam pegai parlimen Serian ungkup renggat ketiga kemari.
Raban RELA ke bisi bakal maya bejalaika tanggungpengawa bisi mega nerima bantu ari Riot ba pengerami nya kemari.
Dua iku raban RELA Jackie Anod enggau Solamun Fakhrudin bela nerima RM2,250 enggau RM1,536 pengudah napi penusah di jalai alun lalu Peter Misen nerima RM1,1750 pengudah iya napi penusah ba seiti program ngemanah rumah ti ngujungka kaki iya patah.
Sofia Ligau, balu RELA Allan Ting nerima RM14,000 pengudah ditinggalka laki iya mati.