// Dikarang Judan Bungap //
BERANDAU: Catherine (tengah) berandau enggau raban orang ke gawa ba Sepital Kanowit.
KANOWIT: Chairperson Kaunsil Pemansang Orang Indu, Ruang Bilik enggau Mensia Mayuh P.210 Kanowit Dato Catherine Gramong enggau raban iya bisi nemuai ngagai Sepital Kanowit, empai lama ke udah.
Penatai sida tu bela disempulang Menteri Muda Dagang Temuai ti mega Menteri Muda Pemansang Tanah Datuk Gramong Juna enggau Pemesai Pelilih Kanowit Katis Noel Nyabong.
Maya ke nemuai nya, Catherina bisi nyuaka pemeri hamper enggau anak belanja ngagai 60 iku sida ke berubat ba sepital nya.
Kelimpah ari nya, iya mega ngena awak tu berandau enggau raban ke gawa dia.
Dulu agi ari tu, Catherine dipebasa bejadi Program Hari Orang Indu Renggat Pelilih Kanowit ba Tebing Sungai Kanowit.
Rambai jaku pengerami tu iya nya ‘Sarawak Women In The Arts’.
Udah bejadika pengerami, iya enggau bala raban bukai ngulu ‘Walk Of Love’, bejalai kaki ba sebelah pasar Kanowit seraya berandau enggau bala dia.
Program tu sebengkah ari pengawa dikena ngerami agi Pengerami Ngintu Hari Orang Indu Renggat Pelilih Kanowit serak tu.