Kededua organisasyen ngembuan juluk nyungkak pemansang dagang kelebih agi di Sarawak
KE PENGINGAT: Nanta (tengah) enggau Nakano besilih memento maya pengerami makai lemai nya. Ba sepiak kiba nya Ibrahim.
KUCHING: Majlis Amanah Rakyat (Mara) enggau OISCA (Organisation for Industrial, Spiritual and Cultural Advancement) ngaku asil pemujur ba pengawa latih industri pengelama 38, nyadi tanggungpengawa sida nyungkak pemansang pengawa dagang kelebih agi di Sarawak.
Menteri Pemansang Menua Pesisir enggau Kandang Menua, Datuk Alexander Nanta Linggi madah, kerejasama entara Mara-Oisca dudi ila deka nyadi nyata ba sekeda program pengawa dagang baka dagang inkubator, attachment and internship, start-up consultation including business enhancement training enggau industrial study tour.
Ku iya, Mara enggau Oisca ngembuan kaul sejarah kenyau ari taun 1967 nengah program latih industri di Jepun, ke alai bala nembiak diberi peluang belatih sereta ngasaika peneleba ba organisasyen enggau industri ke besai. Program latih nya udah ngawakka bala nembiak ngulihka peneleba enggau pengelandik teknologi lalu ti beguna amat iya nya etika, peninggi tikas enggau chara orang Jepun gawa.
“Nengah kerejasama tu aku pechaya ulih nempa orang dagang ngembuan dua bengkah chara gawa ti ngulihka sida ngembuan pengelebih besemekih ba dunya dagang.
“Kami mega arapka nengah kerejasama entara Mara-Oisca, kitai bulih penemu ti beguna amat ba kaul ke manah enggau ngenegapka pengerembai sereta penyulut dalam pengawa dagang nyengkaum kaul ba kandang dagang, industri enggau impek besai teknologi sereta pengawa besilih entara orang dagang enggau industri,” ku iya lebuh bejadi pengerami makai lemai beserimbai enggau Forum Dagang Antarabansa Ke-4 2015, di Pullman Hotel ditu kena Hari Dua tu tadi.
Bela bisi ngulu pengerami nya Mandal Eksekutif Presiden Oisca Antarabansa, Toshihiro Nakano enggau Mandal Presiden Oisca Antarabansa Malaysia, Datuk Ibrahim Ahmad ti mega Direktor General Mara.
Ku Nanta, nengah penyampau semua 124,000 kilometer pesegi tanah, Sarawak ngembuan 37.7 peratus tanah darat di nengeri tu. Nengeri tu mega ngembuan mayuh pesaka asal baka petroleum, gis asli enggau mineral sereta produk betanam betupi enggau kampung. Laban nengeri Sarawak ba endur ke strategik, Sarawak ngechul nyadi hub ke manah alai beranakka puku sereta ngembuan pengelebih endur besemekih.
Ku iya baru, nengeri tu mega ngembuan rampa menua enggau eko-dagang temuai ti ulih nyadi pematak temuai baka taman negara, kampung galau, palan pengintu jelu siga enggau palan ti ngembuan sejarah. Kelimpah ari nya, Sarawak mega nyadi pemansut besai ba sektor betanam betupi, ngeluarka pemakai ungkup dikena ba menua tu empu enggau asil utai tanam bukai ke eksport.
Sektor pengawa betanam betupi, kampung enggau berikan nyadika kunchi ekonomi nengeri sereta ngemayuhka penguntung ba ekonomi dalam kandang beberapa taun ke udah.
“Pengawa Industri ba kandang Koridor Kuasa Tau Dikena Baru Sarawak (SCORE) deka nyendiaka peminta ke besai ba pengawa betanam betupi laban aktiviti memproses pemakai ba renggat ke baruh deka dikerembaika. Peminta ke besai ba tikas global, disempulang enggau pengawa ngemodenka injin dikena memproses pemakai baka beras, asil pemadu baru enggau rempah, patut ulih nyaup nyungkak pemansang sektor tu.
“Diatu, Sarawak majak mansang dalam bidang aktiviti ekonomi enggau industri pengeluar. Nengah chara teatur ngaduka pemansut pesaka asal sereta ngemeratka pengawa memproses ba renggat ke baruh, Sarawak ulih nentuka peninggi rega ba produk ti dikeluarka,” ku iya.
Forum Dagang Antarabansa Ke-4, Mara-Oisca taun tu diatur endur ngelaku sereta ngemasangka orang dagang di menua tu nengah komitmen ke besai agi ngambika setipak enggau rambai jaku “Investing towards Sustainable Energy and Agro-based Industry”.
Ngenang pasal konferen ti diatur ngelama tiga hari ti tembu kemari, Nanta madahka stratergi kaul ti bisi dibantaika maya forum dagang tu deka nempa platform ungkup orang dagang nujah mayuh agi peluang dagang ke baru ti deka nyadika penegap besemekih ba makit menua tu enggau global.
BEPERINDANG: Pengari ari menua luar enggau menua tu empu ti bisi ngambi bagi mantaika adat asal ba pengerami malam nya.