KUCHING: Kepala Menteri Datuk Patinggi Tan Sri Adenan Satem madahka diri bedau mutuska nasit Kaban Kusil Nengeri (ADUN) Tasik Biru, ti mega nyadi Menteri Muda Pemansang Industri Datuk Peter Nansian sekalika agi bediri ba sitak iya maya Pengawa Bepilih Nengeri (PRN) tu ila. Iya madah munyi tu ba pengerami ngintu pengada ke-60 DBNA apin lama ke udah.
Nansian madahka iya enggau kaban bukai ke sama dalam Parti Tenaga Rakyat Sarawak (TERAS) endang seruran ngumbai sida kaban Barisan Nasional (BN) sereta ngembuan kaul ke tegut enggau BN.
“Kami arapka ketuai kami (Kepala Menteri), nengah jaku lalau iya ngasuh kami bebendar agi gawa lalu deka meri pemutus ila, siti pengadang ke manah…Aku arapka iya deka meri pemutus ke pemadu manah ke BN enggau rayat.
Iya madah munyi tu lebuh dikerandau pengarang berita pengudah bejadika atur pengawa Konvokesyen ke-19 Kolej Sunway ba sebuah hotel entarabansa ditu, kemari ti digulu urung seratus nembiak ke udah nembuka kus sida iya dalam bidang ACCA enggau CAT.
Iya nandu baru, Kepala Menteri ti mega nyadi Chairman BN Sarawak seruran ngelalau semua komponen parti BN deka ngerintaika chalun ke ulih menang.
“Sida ke gawa bebendar, bisi rikod manah lalu seruran gawa ke rayat, orang ti ulih dikearapka Kepala Menteri, chalun ke ulih menang. Aku pechayaka ketuai kami, baka ku aku tadi, aku orang ti talukka BN.
“Nya alai, awakka Kepala Menteri ngena penemu iya ngerintaika sapa chalun ke pemadu manah ungkup BN sereta ke mega ke pemadu regas gawa ke rayat,” ku iya.
Nansian ti mega Sapit Presiden TERAS madah, enti diperatika ari sejarah, keterubah iya masuk politik, Nansian nadai begempung enggau sebarang parti, tang maya nya, Kepala Menteri Tun Pehin Sri Abdul Taib Mahmud (TYT Sarawak kediatu) ngasaika Nansian mih chalun ke pemadu engkeman bediri ba sitak Tasik Biru.
“Nyentuk ke sehari tu ketuai BN mengkang beratka chalun ke ulih menang ba siti-siti sitak lalu gawa mantu rayat. Nya alai, awakka mih Kepala Menteri ti mega chairman BN milih chalun ke pemadu engkeman bediri ba kerusi BN.
“Ba aku, gawa bebendar agi ngambika aku bisi peluang ke manah agi,” ku iya.
Lebuh ditanya baru, nama kebuah Adenan bejaku bedau mutuska TERAS dalam BN tauka semina ‘kaling BN’, ku Nansian:
“Kami BN Plus, tang sekeda orang ngumbai kami ukai BN, tang ba aku, seagi-agi aku agi nyadi kaban kabinet nengeri ke dipegai perintah BN, aku agi mangku pengawa nyadi Menteri Muda dalam Perintah. Perintah nya dipegai BN lalu ketuai aku minta aku gawa bebendar agi, nama reti nya ba kita?
“Iya (Kepala Menteri) nadai madahka diri enda begunaka aku. Nya alai, aku nyerahka pekara tu ngagai ketuai kami, iya nya Kepala Menteri ti mega chairman BN ngaga pemutus . Aku mendingka jaku iya lalu ngaga pengawa ke diasuh iya,” ku Nansian.