BINTANGOR: Komiti Nembiak Parti Pesaka Bumiputera Bersatu (PBB) N.40 Meradong udah mupuk bejalaika pengawa nempa kaul enggau mensia mayuh ba renggat genturung pendiau dikena ngelala penanggul ke bisi ditapi rayat.
Ketuai Nembiak PBB Meradong, Helmi Morsili madah, agenda enggau konsep ngelawa rayat nya ukai pekara ke baru tang udah dipejalaika sida kenyau ari suba.
“Bepelasarka perati raban kami, kenyau konsep tu dipejalaika mayuh pangka positif ulih digaga ngagai mensia mayuh.
“Nengah program baka tu kami ulih mutarka sekeda penanggul ke bisi ditapi rayat enggau lengkas, naka tu kami nerima timbal ke chukup manah,” ku Helmi.
Iya madah munyi nya ngagai media pengudah nyereta program Taqqarub diatur Opis Pekara Khas (Jasa) ditu, kemari.
Kenu ku Helmi, Komiti Nembiak PBB N.40 Meradong deka terus bejalai ngaul rayat dikena ngelala penanggul ke bisi ditapi sida.
Iya madah, pengawa ke diatur sida nya ukai bemusim tang dipejalai nitihka peminta mensia mayuh.
Helmi madah nengah program tu baka nya mega sida ulih beteleba sereta nempa pemanah kaul enggau semua orang.
Iya madah, sida deka terus bejalaika program nya ukai semina maya pengawa bepilih aja.
“Kami naka ulih gawa enggau manah dikena mantu rayat,” ku iya seraya madah parti benung nyikap diri napi pengawa bepilih kunsil nengeri (PRN).
“Rayat meri sukung ke pemadu madah ngagai perintah ke diiring Kepala Menteri, Datuk Patinggi Tan Sri Adenan Satem. Tu diumba enggau pengandal sida ngagai perintah Barisan Nasional (BN),” ku iya.
Berebak enggau nya, Helmi enggau bala kaban Komiti Nembiak PBB N.40 Meradong bisi ngabas sekeda genturung pendiau seraya nyuaka bantu ngagai bala penerima ke patut.
