Mayuh pengerami diatur maya bulan September baka Hari Pengada TYT, Merdeka enggau Hari Malaysia
Dikarang Chris Bishop //
BELA ENGGAU: Entara sekeda ari 8 tim ti deka be-pekit ba lumba perau naga renggat entarabansa.
KUCHING: Regatta Sarawak ungkup taun ti deka datai diperambu diatur dalam bulan November, ku Menteri Dagang Temuai Datuk Amar Abang Johari Tun Abang Openg.
Mansutka pekara nya lebuh dikerandau pemberita kemari, Abang Johari madahka mayuh pengerami diatur dalam timpuh bulan September di nengeri tu, lalu perambu ngelanjar regatta ngagai bulan November tau nyaup matak mayuh agi temuai datai.
“Aku berati maya bulan September kitai ngintu mayuh pengerami. Kitai bisi pengerami ngintu Hari Pengada Tuai Pemegai Menua (TYT), Hari Merdeka enggau Hari Malaysia.
“Aku merambu regatta dilanjar ngagai bulan November iya nya maya nembiak kemisi laban tu mih maya orang nyengkaum sida ari menua luar suah nemuai. Enti kitai bisi pengerami, tau endar matak sida datai ke Kuching,” ku iya.
Abang Johari ke mega Menteri Pengawa Berumah madah, raban pemesai ari opis iya deka beratika timbal ari mensia mayuh sentang perambu nya ketegal pechaya tau matak mayuh agi temuai datai ke Sarawak.
Dulu agi ari nya iya bejadi pengawa nitik mata perau naga lalu mega bejadi Festival Kraf enggau Festival Pemakai di Waterfront Kuching.
Ngenang sentang Regatta Sarawak 2015, Abang Johari madah regatta taun tu diadu lama agi, iya nya dalam timpuh 11 ngagai 12 hari ke alai mayuh pekit lumba nyengkaum pekit ke baru bisi diatur.
Iya mega madah, regatta taun tu mujur matak mayuh agi penyereta ari menua luar baka ke ari Australia enggau Hong Kong.
“Kelimpah ari nya kitai mega nyendiaka pekit lumba perau naga ungkup kitai menua tu aja. Raban ari kelab rama, opis perintah sereta universiti deka enggau bepekit,” ku iya seraya madahka pekit lumba perau entara univerisiti deka diadu ba taun ti deka datai.
Lumba perau naga renggat entarabansa deka disereta 8 iti tim/menua iya nya ari Brunei, Filipina, Taiwan, Jepun, Hong Kong, Indonesia, Singapura, Kedah enggau Sarawak.
Sarawak Regatta 2015 diatur berengkah 18 nyentuk 27 September 2015, ke alai TYT Tun Pehin Sri Abdul Taib Mahmud deka bejadi pengawa nutup regatta kena 27 September tu.
Bela bisi datai kemari, Menteri Muda Dagang Temuai Datuk Talib Zulpilip, Menteri Muda Pemansang Orang Dagang Bumiputera Datuk Mohd Naroden Majais, Sekretari Mendam Opis Menteri Dagang Temuai Sarawak Datu Ik Pahon enggau orang bukai.