SIBU: Peranak Rumah Merikan Bual di Lubok Pelaie, Passai patut beterima kasih ngagai perintah Barisan Nasional (BN), kelebih agi nuju pengari rayat sida laban ke udah mujur nyendiaka perengka infrastruktur ke meruan ngagai sida.
Rumah panjai ke bisi 24 pintu diuan urung 150 rayat nya diatu udah ulih lawa nengah sebatang jalai alun bebatu bepun ari jalai besai iya nya Jalai Teku Passai.
Enti dibanding enggau jalai ke semina ayan tanah ngelama tu, pengawa nyungkur jalai lalu diiri enggau batu nya ngemuntangka rayat mayuh bejalai kulu kili, kelebih agi maya deka nurun ke pasar Sibu.
Sekretari Politik Kepala Menteri Andrew Shilling Banggit madah, projek jalai 6 kilometer nya udah tembu digaga apin lama ke udah.
“Ungkus bejalaika projek tu RM600,000 nengah Projek Transformasyen Menua Pesisir (RTP),” ku iya madah ngagai pemberita pengudah ngabas projek nya ngarika Kaban Kunsil Nengeri (ADUN) Bawang Assan, Dato Sri Wong Soon Koh, kemari.
Sama bisi datai ngabas projek tu ‘Juruteknik Awam’ Opis Kereja Raya, Yong Sin Ho, Pengulu Richard Ampi, Tuai Rumah Dawi Ringgil sereta sida ke bukai.
Kelimpah ari nya, kenu ku Andrew, jalai di mua Rumah Merikan mega deka disemin nengah agih belanja beungkus RM150,000.
Projek nya ku iya, dipejalaika nengah Projek Infrastruktur Asas (PIAS) lalu deka tembu enda lama agi.
“Semua projek tu mandangka penyiru pengari rayat ditu bekaul enggau perengka ke diguna rayat.
“Nya alai, nadai kebuah rayat enda nemu malas pemanah perintah BN enggau pengari rayat ditu,” ku iya.