Gambar Pengias
BISI KENA PECHIK: Berindik ari rega minyak niki, penyual mega nikika rega. Nya alai, mayuh raban penyual semina nyual barang ke dikerindu mensia mayuh aja.
SEREGA BEBELIKA BARANG: Nitihku seiku penyual ba Boulevard Shopping Mall madah, iya ka pan enda berengkah tumu (pun bulan Nov) nyual ayam Krismas enggau barang bukai kena napi penyual bukai ke berebut bejualka barang nyerumba Hari Krismas tu.
MIRI: Nyerumba enggau Hari Krismas nyau majak semak tu tadi, penyual udah nyikap diri tumu mandangka pun kayu enggau ayam tauka pemeri Krismas ba sebelah pasar besai bebelika barang ditu.
Berebak enggau nya, pengempu kedai enggau bansal-bansal bukai udah berengkah nudukka sekeda pun kayu Krismas kena narit ati bala pemeli.
Nitihku pengari ari Boulevard Shopping Mall ke semina dikangau nama Chan madah, kelimpah nyendiaka pun kayu Krismas ke udah diias, sida mega bisi nyendiaka ayam Krismas, lampu Krismas enggau utai bukai dikena narit ati mensia mayuh meli tumu ba pun bulan November.
“Baka ke udah-udah, penguna milih meli tumu kena nyeliahka berebut maya deka datai ba hari nyadi Krismas. Nya alai, kami patut nyikap diri dulu kena nukuka peminta penguna ulih dititihka,” ku iya.
“Taja pan rega mar, tang penyual mengkang nambahka penyampau tang semina nyual ke nerima sambut ari mensia mayuh aja.
“Ari lampu LED, stokin enggau bungai Krismas, pun kayu Krismas enggau ayam bukai, Chan madah semua barang ke dijual nya mayuh macham pemesai, kualiti enggau rega,” ku iya seraya madah sida ngaga baka nya ngambika penguna mayuh pilih.
Kelimpah ari meli sebelah kedai, penguna mega meli nengah online.
Wyjane Lai, seiku penyual ngena chara online ba kedai portal China ke tebilang, Taobao madah, barang ke dibeli jampat datai, rega murah enggau dianjung nyentuk ke mua pintu kebuah penguna mayuh milih chara online tu.
“Taja aku rindu agi meli ngena chara nya (online) tang aku mengkang bejejaga ari kena tipu,” ku iya ke madah diri kala kena tipu ngagai The Borneo Post.
Maya The Borneo Post matau ba portal kedai, mayuh amat barang ke dijual nengah chara online nyerumba hari Krismas ke ngelakuka barang sida nengah rambai jaku baka ‘Get ready for Christmas’ enggau ‘Christmas Trees under $10USD’.
“Aku ulih milih nama bansa barang dikedekaka aku nengah online, nya alai, aku enda deka ngetu begunaka chara Internet,” ku Lai.