BINTULU: Saspek kes bunuh Tiang Lee Yee ti munuh bini iya Ling Yung Ming enggau dua iku agi anak seduai Christine, 14 enggau Victor, 2 ba Lorong 1B Pulau Li Hua, Sibu empai lama tu tadi dibai polis ari Sibu ke nasat kes nya ngagai kedai alai saspek meli tali hos ke dipelabaka deka dikena iya munuh diri.
Bala raban polis ti mai saspek datai ba Bintulu urung pukul 12.30 tengah hari lalu terus nuju kedai tu dikena sida mansik enggau silik senentang kes bunuh tu.
Nitihka penerang, hos nya dipelabaka deka dikena Tiang munuh diri empu ba dalam kereta ti dikena iya ngelarika diri ke Bintulu sepengudah munuh sida sebilik sebedau iya ditanka polis ba sebengkah stesyen minyak ba jalai Bintulu-Sibu.
Lebuh ti datai ba kedai nya, polis lalu minta saspek ngelala raban pengereja pengawa ti endur iya meli hos nya tadi, taja pia saspek enda ingat gamal seiku ari pengereja pengawa nya.
Pia mega, bala pengereja pengawa nyau enda ingat ke gamal saspek rabau iya ti meli hos ba kedai nya.
Meda bakanya, polis ti nasat kes tu lalu minta pemendar mai semua bala pengereja pengawa ba kedai ti gawa maya nya ngagai One Stop Centre Indu Opis Polis Pelilih Menua Bintulu dikena ngulihka penerang pasal semua penerang tauka pekara ti ditemu sida sehari nya.
Saspek udah nya mega dibai polis ngagai stesyen minyak alai iya ditangkap sehari nya dikena ngulihka pansik silik agi bekaul enggau pengawa ti dikereja iya sepengudah munuh sida sebilik ba Sibu.
Ba penusah ti nyadi tu, anak tuai iya Tiang Soon Tai, 17, ulih ngelarika diri enggau jalai merejuk ari balkoni ringkat atas bilik tinduk iya laban ti digagai apai iya ti deka ngemedis sereta munuh iya.
Taja pia, Tiang Soon ulih ngelarika diri laban ti diselamatka orang ba rumah sepiak sida empu ti diau betimpai enggau rumah sida lalu udah nya ngangauka polis ambika nasat sereta nangkap suspek.