SIMUNJAN: Bala orang ke begagaka asil pengelandik jari tikai Sarawak, diasuh ngasilka tukuh tikai sida ngayanka main asal raban bansa asal di nengeri tu.
Menteri Muda Pemansang Pekara Dagang Orang Asal Datuk Mohd Naroden Majais (gambar) bejaku madahka, tikai Sarawak bisi ngembuan penarit iya empu. Bekaul enggau nya sida tu patut landik ngerebut awak ngambika asil pengelandik ulih dijual.
“Tikai Sarawak antara tiga produk dagang temuai di nengeri tu ke nyadi tumpu temuai ke datai lalu diambi nyadika buah jari dibai sida pulai.
“Chura enggau tukuh ke dianyam sida ari mayuh bengkah buah ke bebida nitihka kandang endur enggau tikai bansa Iban, Orang Ulu enggau Bidayuh bisi ngembuan penyelai enggau buah sida empu,” ku iya.
Tambah mega ku iya, nengah asil pengelandik jari kitai ulih ngayanka main asal seraya ulih nambat ati temuai menua enggau menua tasik.
Iya bejaku munyi nya ba atur pengawa Nyuaka Setepikit Projek Asil Pengelandik Jari Begaga Tikai Sarawak Kampung Keniong Lama ke diatur Unit Pemansang Dagang Orang Asal (UPUB) ditu bedau lama ke udah.
Naroden ke mega ADUN Simunjan madahka iya gagit meda orang ke masuk dalam pengawa begagaka tikai di Simunjan ngambika sida bekunda berundingka jalai ke tau mida asil pengelandik jari sida enti dibanding enggau pelilih menua bukai.
Tambah iya, dagang handikraf kelebih agi tikai Sarawak bisi mayuh peminta bepelasarka rikud dalam pemandang handikraf bedau lama ke udah, ke alai semua tikai ke dipandang nya udah dijual magang.
“Ambika banding, nyema seiku indai rumah ulih ngasilka lalu bejualka empat lambar tikai sebulan dia iya deka bulih untung kasar semak RM1,000,” ku iya.
Ba atur pengawa nya, Naroden bisi nyuaka setepikit tamat kus ngagai 15 iku penyereta Asil Pengelandik Jari Begaga Tikai Sarawak Kampung Keniong Lama ke dipejalaika ngelama lima hari kenyau ari 13 Disember.
Iya mega bisi nyuaka geran projek mit luar bandar (MRP) ngagai lima bengkah gerempung di kandang endur Simunjan semua penyampau RM23,000.
Atur pengawa nya digulu Pengarah UPUB Opis Kepala Menteri, Kameri Haji Affandi enggau Tuai Rumah Panjai Kampung Keniong Lama, Simunjan, Andrew Kunti.