SIBU: Urung 1,000 iku bala mayuh ditaga datai ngulu Program Komuniti ke diatur Opis Kunsil Menua Pesisir Sibu (SRDC) ba pasar Sibu Jaya berengkah pagila (21 Disember) nyentuk ke lusa.
Chairman komiti pengatur, Kaunsilor Pasang Ngelambai madah, program nya deka disempulang 12 bengkah pekit.
Pekit tu baka pekit karaoke, ngajat enggau betabuh, futsal, sepak takraw, nyumpit, nyumai pemakai bansa asal, batak tali enggau sukaneka ungkup nembiak mit.
“Kitai mega deka ngatur pekit flat pemadu beresi kelimpah bisi ngangauka artis tebilang merindang bala mayuh.
“Aku ngarapka bala mayuh kelebih agi ba Sibu Jaya ditu ulih datai sampal ngulu pengerami tu,” pia ku iya madah ngagai pengarang berita, empai lama tu tadi.
Ku Pasang, program ke sebaka mega kala diatur ba Tutus, Batang Igan, Skuau enggau Sungai Menyan.
Iya madah, program nya bisi disukung macham bengkah ijinsi perintah baka raban polis, Bomba Sibu, Opis Penagang Makai Dadah Sibu, Opis Menteri Pelajar Malaysia, Opis Perengka Pengangkut Malaysia, Ambank, Bank Simpanan Nasional (BSN), Jabatan Tenaga Buruh, AMcorp Sibu Jaya enggau Opis Pemansang Pengawa Berumah (HDC) Sibu Jaya.
Pengerami bejadika program tu deka dilancarka Residen Sibu lalu pengerami nutup dilancharka Chairman SRDC James Laju Ambok.