BETONG: Mensia mayuh ba sekeda kandang menua ditu betapi enggau penanggul ketegal hari ke suah ujan ditu.
Apin lama ke udah, jalai alun nuju ke Penom tauka Jalai Paku enda jauh ari Bukit Sepu ditu udah betapi enggau penanggul tanah tusur ti ngujungka beberapa buah rumah panjai ba kandang menua nya putus kaul enggau menua luar laban jalai alun nya enda ulih dipansa kerita.
Ku seiku peranak ari kandang menua nya, Edlyn, 40-an, madahka ketegal tanah tusur ke nyadi ba kandang menua, jalan alun ke nyambung sekeda menua di Ulu Paku ditutup.
“Hari ke suah ujan dalam kandang beberapa hari sebedau tu udah nusurka tanah ti ngujungka jalai ba sentang endur nya enda ulih ditengah sereta ngenusahka peranak beberapa buah rumah panjai Iban ba kandang menua nya.
Taja pia, peranak menua ditu nengah jalai bukai ke jauh mimit enti dibanding enggau nengah jalai nya.
“Beberapa buah rumah panjai ke enda jauh ari nya baka Penom, Lubuk Klampu, Nanga Paun enggau sekeda rumah panjai bukai ba ulu nya enggai enda nengah Jalai ulu Layar enti sida deka pansut ke luar.
Seiku agi peranak menua nya, Mathew G, 42 taun madahka, tanah tusur nya udah ngerusakka jalai ke suah ditengah peranak menua nya pansut ke pasar.
“Tanah nya tusur laban hari ke enda ngetu ujan dalam kandang beberapa hari ke udah sereta ngerusak jalai ba sentang bukit ti nuju ke ulu,” ku iya.
“Taja pia, peranak menua nya manah nasit laban perintah bisi ngaga jalai alun dikena nyambung ngagai sesebengkah kandang menua ti ngujungka sida ulih pansut ari menua nya taja pan bisi penanggul nyadi ba palan nya.
Ku iya, jalai simpang Ulu Paku nyentuk ke Sekula Primari (SK) Penom aja ulih ditengah ngagai kandang menua nya.
Taja pia, jalai bukai ditutup sentara ngambika pengawa ngemanahka tanah tusur ba kandang menua nya ulih dipejalaika.
Raban ari JKR benung ngemanahka jalai nya sereta deka dibuka enti udah ulih ditengah baru ila.