Bisi 45 iku anak Dayak udah mujur nembuka Kelas Landik (Advance) Ngajat ke diatur nengah Akademi SADIA
Dikarang Rengenyan Labang //
KUCHING: Bisi 45 iku anak Dayak ke nyengkaum lapan iku lelaki enggau 37 iku indu ti nyereta Kelas Landik (Advance) Ngajat ti diatur Indu Opis Serakup Dayak Iban (SADIA) nengah Akademi SADIA (Asadia) udah mujur nembuka pelajar ngajat renggat pengelandik.
Sida 45 iku nya raban ari 170 iku orang ti udah enggau kelas belajar ngajat ti diatur dalam tiga renggat sepemanjai taun 2014.
Kelas Landik (Advance) Ngajat udah diatur sepemanjai bulan Januari tu tadi, ti diajar tiga iku pengajar ti endang ngembuan mayuh pengelandik ba pengawa ngajat iya nya Elsie Joannes enggau Suloh Luhong ngajar orang indu enggau Joefrazier Jeffery Kemping ngajar sida ke lelaki.
Presiden SADIA Sidi Munan lebuh ti nyuaka setipikit kelas landik (advcance) ngajat ngagai raban lelaki apin lama, iya muji sereta meri peransang ngambika udah tu deka chakah ngangkatka main asal diri.
Berindik ari pemujur kelas nya diatur, Sidi madahka SADIA deka terus ngatur kelas nya jemah ila.
“Aku temegah sereta gaga ati mega pengeransing ati bala kita ti belajar ngagai renggat ti tinggi agi lalu ngarapka penemu tu ulih diajar ngagai rebak dudi.
“Ngarapka semua kitai tauka orang ti udah sereta endang nemu ngajat anang malu mantaika main asal kitai Iban ngambika dikelala sereta ditampung rebak dudi,” ku Sidi.
Nambahka nya, Pengatur Program Ngajat Asadia Mabong Unggang madahka diri temegah ati laban nengah kelas ngajat ke diatur nya, orang ti enda nemu ngajat suba, diatu udal landik ngajat.
“Ari 170 iku ke udah ngereta kelas belajar ngajat sepemanjai taun 2014 suba, bisi 45 iku (ti nyengkaum lapan lelaki enggau 37 iku indu) nyereta kelas landik (advance) ngajat, lalu semua sida (45 iku) udah mujur nembuka pelajar ngajat renggat pengelandik enggau mujur.
“Diatu semua sida nya udah berani sereta enda ngenangika diri dibatak orang ngajat maya Gawai laban ti udah ngembuan penemu ngajat ti chukup,” ku iya.
Berindik ari pemujur taun 2014, kelas belajar ngajat 2015 diperambu berengkah baru dipejalaika bepun bulan Mac ke deka datai.
Kelimpah ari ti deka terus muka kelas belajar ngajat, SADIA nengah Asadia (Akademi SADIA) beperambu deka ngatur kelas belajar pencha enggau silat, betabuh, begendang enggau pengawa asal Iban ke bukai.
“Kebuah Asadia ditumbuh ngambika bisi alai SADIA enggau Iban bukai ngatur pengawa ti ulih niri negi ke jaku Iban, main asal enggau pengelandik nempa utai ti dikembuan bansa Iaban,” ku Mabong.
Ari pengawa ti baka nya, bansa kitai Iban deka dikelala orang datai ke selama iya, ku iya.