SIBU: Serakup Bansa Dayak Sarawak (SDNU) Pampang Sibu udah nyerahka barang pemakai enggau kereban ke diguna ninting hari ngagai peranak Rh Franky, Rantau Panjang kena Hari Tiga tu tadi.
Chairman nya Tengku Gruna madah, tu sebengkah ari pengawa ke dikereja serakup kena mantu orang kena tinggang penusah.
“Kami ngenataika penyiru ati ngagai sida kena ngelempungka tating pengidup sida ke udah ditinggang penusah.
“Arapka bala bukai ke gerah jari tauka raban gerempung ukai dikuasa perintah Dayak ke bukai sama mantu sida tu,” ku Tengku.
Tandu iya, bisi lima buah ruang bilik agi ngenduh enda lama ba Balai Mensia Mayuh ditu.
Raban ke tasah tu begunaka bantu ramu kena ngaga rumah baru sida.
Berindik ari nya, raban ke tasah nya meri besai terima kasih ngagai SDNU laban udah mantu ngelempungka tating penusah sida.
Bulan nyin tadi, bisi 40 iku ari sepuluh ruang bilik nadai palan endur diau ketegal ke rumah kayu sida udah angus diempa api.