SERIAN: Opis Industri Betanam Getah Bedandang Mit (RISDA) diatu benung mekuh sereta chakah nyaup ngemansangka Tanah Adat Bansa Asal (NCR) di nengeri tu, nengah projek nanam baru getah beraban.
Nitih penerang Direktor RISDA Nengeri Sarawak, Wahid Marican Mohamad Daud Marican madah, projek nya dikena ngenyungkak penatai pemisi penyereta tauka orang ti ngempu tanah NCR.
Iya madah, getah ke ditanam nengah projek nanam baru getah beraban nya ulih ngenataika asil ke jampat dibandingka enggau sebedau tu semina ulih ditangkal enti udah manggai lima ngagai enam taun.
Ambika banding, penyereta Genturung Pendiau Kerait Mawang, Serian, dalam timpuh empat taun setengah ila kebun getah nya ulih ditangkal sereta dipelaba ngasilka 2,000 kilogram (Kg) sehektar setaun sereta bepanggai ba rega makit maya nya ila, ku iya.
“Nitih juluk projek Genturung Pendiau Kerait Mawang tu, dalam taun 2018 ulih ditangkal sereta dipelaba rega getah maya nya RM10 sekilogram, ba sehektar sida teulihka 2,000 kg setaun, reti iya ba sehektar (nyema rega RM10) sida teulihka asil RM20,000 setaun, enti sebulan urung RM1,600 ngagai RM1,800.
“Enti penyereta nitihka chara nangkal ke udah diajar enggau betul, getah tu ulih ditangkal pengelama 25 taun berengkah ari taun 2018, sereta ngeluar ka asil ti majak nambah, bepanggai ba rega enggau pemesai kandang getah ditanam.
Wahid mansutka penerang tu ngagai pemberita maya aum pengarang berita pengudah bejadika projek nanam baru getah beraban ba Genturung Pendiau Kerait Mawang, Serian, ti diatrur di palan projek nya ditu, kemari.
Bejaku baru iya madah, sebedau tu RISDA semina bejalaika projek nanam baru getah ba tanah begeran tauka diempu seseiku orang, tang berengkah taun 2012 RISDA udah mantu ngemansangkan projek ba tanah NCR.
“Nyentuk ke seharitu, bisi empat projek nanam baru getah beraban ba tanah NCR di Sarawak udah dikemendarka iya nya Tanjung Bundong (taun 2012); Ibau, Kapit (100 hektar lebih); Pakan, Julau (urung 200 hektar) enggau di Genturung Pendiau Kerait, Serian bisi 63 hektar ari 32 pengempu tanah.
“Taun 2013 RISDA deka ngatur program pemansang nanam baru getah ba 4,000 hektar pemesai tanah NCR. Serata Sarawak bisi 5,600 peminta tauka penyereta.
“Kitai udah ngemendarka urung 5,000 hektar. Nyentuk ke seharitu ti udah tembu sereta udah dibayar bisi 2,600 hektar, lalu laluh ke bukai nya agi dalam kereja pemansang baka nebang kayu enggau ke bukai, dipelabaka ujung bulan Oktober kitai mayar 4,000 hektar agi,” ku iya.
Wahid ngarapka mayuh agi tanah NCR di Sarawak dikemansangka nengah projek nanam baru getah beraban, beduduk ari pengawa nyukat perimeter diatu udah dipejalaika enggau jampat.
Sama bisi dalam aum pengarang berita nya kemari, Ketuai Genturung Pendiau Kerait Mawang, KK Chochok enggau pengari ari opis RISDA bagi menua Samarahan sereta ke bukai.