KUCHING: Kepala Menteri Pehin Sri Abdul Taib Mahmud pechaya pemaik kaul entara tiap pupu bansa ti disepi peranak nengeri tu pengelama udah merdeka nyadi asil ari pemereti ti enda bangat bekiraka bansa, pengarap enggau penatai asal.
Ku iya, pemereti nya udah ngiring nengeri tu nyapai pemansang baka ke dipeda diatu ke alai sekula (kelia) mega udah mantu ngenegapka semengat bebasaka kaul entara pupu bansa.
“Jeman kami besekula kelia, aku begulai enggau bemacham bansa, baikka nya Melayu, Iban, Bidayuh pia mega China.
“Nadai seiku ulih nyangkal, sekula sigi palan endur semengat segulai ti enda bekira bansa, pengarap enggau penatai asal dimun. Bepun ari nya, kitai di Sarawak ngembuan seiti komuniti ti chukup manah,” ku iya.
Taib mansutka jaku tu ba pengerami bejadi rumah baru St Joseph Private School (SJPS) di Jalai Nagor ditu, kemari.
Iya ke kala belajar di St Joseph madah semengat nya udah digenggam rat tiap peranak Sarawak nyentuk ke diatu.
“Ba pengawa bekimpin aku di rumah panjai Iban, genturung pendiau Bidayuh enggau Orang Ulu, sida iya meda aku ukai semina seiku ketuai bansa Melayu.
“Tebal agi sida iya ngaku aku ketuai sida iya,” ku Taib.
Ba kaul ke sama, Chairman Board of Director Tan Sri Datuk Amar Leo Moggie ba jaku pengelalu iya madah nembiak sekula ti manah ukai semina dikelai nengah pemutus ti nyulut tauka runding ti landik.
Ku iya, semua pekara tauka penyulut ti udah dijapai nadai mai reti enti kitai enda mujur ngadaka raban pelajar ti ngemeratka pemaik komuniti sereta angkun nentuka komuniti ngelingi endur ke pemadu manah endur diau.
“Nembiak SJPS patut ulih nangkup semua pekara dalam ubah baru dunya enggau ati ti lurus,”ku iya.
Kena nentuka nembiak SJPS nerima pelajar ti pemadu manah, Moggie netapka dia sabjek Matematik enggau Sains deka diajar dalam jaku English lalu ukai reti ngemelakangka jaku Bahasa Malaysia, tandu iya.
Iya mega madahka SJPS nyadi sekula Katolik keterubah ti nyendiaka program belajar kitab kudus lalu pelajar Pendidikan Moral disedia ngagai nembiak Islam.
Manggai ba taun2014, SJPS deka bisi 11 bilik kelas ungkup nembiak sekondari lalu 7 bilik ungkup nembiak primari.
Ba taun 2012, SJPS bisi 147 iku nembiak lalu ba taun 2013 penyampau nembiak ke belajar dia manggai 363 iku.
Rumah baru SJPS dikemujur nengah pemeri ari perintah besai sepenyampau RM3 juta, The Archdiocese Kuching RM3 juta, The Community Chest RM2 juta, YTL Power Generation RM1 juta, KTS Building Foundation RM1 juta sereta sekeda pemeri bukai.
Bela datai Pn Sri Ragad Kurdi Taib, ArchBishop John Ha sereta orang bukai.