KUCHING: Sebuah gerempung ukai dikuasa perintah (NGO) Iban ngenataika sebana sida bekaul enggau perambu duku ilang enda dikemendar tauka enda ulih disimpan ketegal dipadahka bisi bekaul enggau penyalah jai ba raban gangster.
Chairman Gerempung Dayak Iban Sarawak (SADIA) Pampang Kuching Dato Anthony Nait Mani madah duku ilang enda patut ditetapka nyadi senyata ke enda likunbaka senyata bukai ba baruh Akta Menghakis, Bahan Letupan dan Senjata Berbahaya 1958.
Enti duku ilang ditetapka nyadi senyata ke enda likun, iya madah nyangka nyauka semua bansa Iban ngelanggar undang-undang nya.
Nait madah endang udah nyadi adat ruang bilik bansa Iban enggau Orang Ulu ngembuan ambis nadai seiti duku ilang ke disimpan ba rumah laban nya perengka ke beguna bendar ba raban bansa nya, enda nyalah-nyalah baka ke nyimpan lungga ba dapur.
Tandu iya, duku ilang enda ulih disema baka samurai tauka keris ke tau dikena maya belaya sereta dikelala ba serata dunya.
“Duku ilang dikena netak isi jelu (dagin), kayu enggau nyadika kereban dikena maya ngatur pengawa beripai. Nya ukai baka samurai tauka keris ke suah agi dikena maya belaya.
“Enti baka nya, nama kebuah enda nagang lungga tauka pemuka skru dikena deh? Laban kededua barang nya tau dikena ngereja penyalah jai baka munuh orang enggau ngenchuri,” ku terang iya enggau silik.
Nya alai, Nait arap bendar perintah enda mendingka perambu nagang duku ilang dikena. Iya mega andal undang-udang ke diatu udah chukup kena mutarka kes bekaul enggau bunuh sereta penyalah jai ke bukai.
Ku iya, polis bisi hak nanya nama kebuah mensia mayuh nyimpan senyata dalam kerita nangika tau ngenataika penusah besai baka kes bunuh laban nya ulih dipelabaka bisi bekaul enggau kes penyalah jai.
Enti sema penerang sida (mensia mayuh) ke nyimpan senyata nya enda ngemuaska ati, sida tau dibai ngagai balai polis ngambika dipansik enggau silik, ku tandu iya.
“Nya alai, enda ibuh nagang duku ilang ari dikena tauka disimpan mensia mayuh laban undang-undang udah mayuh kena mutarka kes besai baka kes bunuh tu,” ku iya.
Ba senentang isu rama, Nait madah perambu enda ngemendarka duku ilang dikena tauka disimpan, nya disadang ngenataika isu bansa jemah ila, berindik ari nya iya andal perambu nya patut diketuka.
Enti sema bisi orang berandauka nama kebuah kes penyalah jai majak niki kemayahari tu, sida patut berandauka ni bansa ukum ke engkeman agi dilempai ngagai orang ke ngereja penyalah jai nya tang ukai berandau nagang duku ilang ari ke enda ulih dikena, ku perambu iya.
Iya mega merambu ngagai piak ke bekuasa, ngenyungkka agi tikas pengawa nginau kandang mengeri tauka ba genturung pendiau bukai kena mutarka kes penyalah jai ari ke majak niki.